labon ke pas tumhaare kahan se aai choT

laboñ ke paas tumhāre kahāñ se aa.ī choT

burā ho ġhair kā us ne dī ye parā.ī choT

tirī nazar ne is andāz se lagā.ī choT

nishāna dil kā liyā aur jigar pe aa.ī choT

ye kyā kahā ki bichhaḌ kar hameñ lagā.ī choT

visāl ham se kare hai shab-e-judā.ī choT

unheñ gavāra nahīñ koī ḳhūb-rū ḳhud sā

jo aa.ine meñ bhī dekhā use lagā.ī choT

banī hai ahl-e-suḳhan ke har ik maraz kī davā

ġhazal meñ hazrat-e-'hāris' ne kyā nibhā.ī choT

tah-e-mazār hamārā 'azāb ḳhatm huā

jo tum ne Thokaroñ se qabr par lagā.ī choT

lagā huā hai use merī aah kā chaska

davā se kartī rahī hai mirī burā.ī choT

burā na kar sakā kuchh zaḳhm-e-dil hamārā ki ham

jahāñ meñ laa.e the us par lagī-lagā.ī choT

sabab jo dāvar-e-mahshar ne is se pūchh liyā

tumhārī samt nazar kar ke muskurā.ī choT

sitam-zarīf koī had sitam kī bhī hogī

tirī nazar se kahāñ tak kare laḌā.ī choT

ġhazal to kaam hai 'hāris' zabān vāloñ kā

baḌe-baḌoñ ne suḳhan meñ yahāñ pe khaa.ī choT

labon ke pas tumhaare kahan se aai choT

bura ho ghair ka us ne di ye parai choT

teri nazar ne is andaz se lagai choT

nishana dil ka liya aur jigar pe aai choT

ye kya kaha ki bichhaD kar hamein lagai choT

visal hum se kare hai shab-e-judai choT

unhen gawara nahin koi KHub-ru KHud sa

jo aaine mein bhi dekha use lagai choT

bani hai ahl-e-suKHan ke har ek maraz ki dawa

ghazal mein hazrat-e-'haaris' ne kya nibhai choT

tah-e-mazar hamara 'azab KHatm hua

jo tum ne Thokaron se qabr par lagai choT

laga hua hai use meri aah ka chaska

dawa se karti rahi hai meri burai choT

bura na kar saka kuchh zaKHm-e-dil hamara ki hum

jahan mein lae the us par lagi-lagai choT

sabab jo dawar-e-mahshar ne is se puchh liya

tumhaari samt nazar kar ke muskurai choT

sitam-zarif koi had sitam ki bhi hogi

teri nazar se kahan tak kare laDai choT

ghazal to kaam hai 'haaris' zaban walon ka

baDe-baDon ne suKHan mein yahan pe khai choT