labon pe mohr-e-KHamoshi zaban pe tala hai

laboñ pe mohr-e-ḳhamoshī zabāñ pe taalā hai

zarūr phir koī tūfān aane vaalā hai

agar ye thaam na letī to gir paḌā hotā

tumhārī yaad ne mujh ko baḌā sañbhālā hai

kisī ke chehre pe bikhrī haiñ jā-ba-jā zulfeñ

kahīñ paḌā hai añdherā kahīñ ujālā hai

abhī to aage bahut imtihān baaqī hai

abhī to sirf parindoñ ne par nikālā hai

mire liye to yahī intizām kaafī hai

ki mai-kadoñ meñ mire naam kā piyāla hai

usī kī zaat se hai saarī kā.enāt meñ rang

usī ke husn kā duniyā meñ bol-bālā hai

agar zamīr kī qindīl ho ga.ī raushan

to phir samajhiye añdhere meñ bhī ujālā hai

raheñ charāġh bhalā kis tarah 'zakī' mahfūz

havā.eñ DhūñD rahī haiñ kahāñ ujālā hai

labon pe mohr-e-KHamoshi zaban pe tala hai

zarur phir koi tufan aane wala hai

agar ye tham na leti to gir paDa hota

tumhaari yaad ne mujh ko baDa sanbhaala hai

kisi ke chehre pe bikhri hain ja-ba-ja zulfen

kahin paDa hai andhera kahin ujala hai

abhi to aage bahut imtihan baqi hai

abhi to sirf parindon ne par nikala hai

mere liye to yahi intizam kafi hai

ki mai-kadon mein mere nam ka piyala hai

usi ki zat se hai sari kaenat mein rang

usi ke husn ka duniya mein bol-baala hai

agar zamir ki qindil ho gai raushan

to phir samajhiye andhere mein bhi ujala hai

rahen charagh bhala kis tarah 'zaki' mahfuz

hawaen DhunD rahi hain kahan ujala hai