labon pe pyas wo tahrir karne wala hai

laboñ pe pyaas vo tahrīr karne vaalā hai

shu’ūr-e-zāt ko taqrīr karne vaalā hai

jo ḳhvāb dushman-e-jāñ hai use vo aaj kī raat

hamārī aañkh meñ tasvīr karne vaalā hai

ye shor chāroñ taraf hai ki aaj shaam ke baa'd

hameñ vo sāhab-e-taqdīr karne vaalā hai

sunā hai aaj dikhā.egā rang-e-harf-o-navā

chalo ki aaj vo taqrīr karne vaalā hai

sunā hai phir se khilā.egā mujh meñ ḳhvāb ke phuul

guzishta rishtoñ kī tā'mīr karne vaalā hai

nikal gayā jo kabhī muñh se be-ḳhayālī meñ

us ek lafz ko jāgīr karne vaalā hai

safar hai sadiyoñ kā jis ko ki merā pā-e-talab

bas ek pal hī meñ zanjīr karne vaalā hai

sunā hai aaj milegā vo ġham-nasīboñ se

sipāh-e-dard ko zanjīr karne vaalā hai

labon pe pyas wo tahrir karne wala hai

shu’ur-e-zat ko taqrir karne wala hai

jo KHwab dushman-e-jaan hai use wo aaj ki raat

hamari aankh mein taswir karne wala hai

ye shor chaaron taraf hai ki aaj sham ke ba'd

hamein wo sahab-e-taqdir karne wala hai

suna hai aaj dikhaega rang-e-harf-o-nawa

chalo ki aaj wo taqrir karne wala hai

suna hai phir se khilaega mujh mein KHwab ke phul

guzishta rishton ki ta'mir karne wala hai

nikal gaya jo kabhi munh se be-KHayali mein

us ek lafz ko jagir karne wala hai

safar hai sadiyon ka jis ko ki mera pa-e-talab

bas ek pal hi mein zanjir karne wala hai

suna hai aaj milega wo gham-nasibon se

sipah-e-dard ko zanjir karne wala hai