labon se kuchh na kaha muddaa jata bhi diya

laboñ se kuchh na kahā mudda.ā jatā bhī diyā

vo merī baat pe chupke se muskurā bhī diyā

havā kī zad meñ mujhe chhoḌ bhī diyā us ne

aur ik charāġh mirī ruuh meñ jalā bhī diyā

ga.e dinoñ ke havāle se mat milo mujh se

vo vāqi.a to bahut din hue bhulā bhī diyā

vo shaḳhs jis ke sabab Thokareñ milīñ aksar

usī ne mujh ko sañbhalne kā hausla bhī diyā

use yaqīñ thā ki maiñ phir use pukārūñgā

mujhe gumāñ thā ki maiñ ne use bhulā bhī diyā

labon se kuchh na kaha muddaa jata bhi diya

wo meri baat pe chupke se muskura bhi diya

hawa ki zad mein mujhe chhoD bhi diya us ne

aur ek charagh meri ruh mein jala bhi diya

gae dinon ke hawale se mat milo mujh se

wo waqia to bahut din hue bhula bhi diya

wo shaKHs jis ke sabab Thokaren milin aksar

usi ne mujh ko sanbhalne ka hausla bhi diya

use yaqin tha ki main phir use pukarunga

mujhe guman tha ki main ne use bhula bhi diya