labrez ho chuka hai paimana zindagi ka

labrez ho chukā hai paimāna zindagī kā

sun jaao ab bhī aa kar afsāna zindagī kā

jab haal aap hī ne pūchhā na zindagī kā

phir kis ko ham sunā.eñ afsāna zindagī kā

ab ham haiñ aur zālim terī galī ke chakkar

gardish meñ aa gayā hai paimāna zindagī kā

kyā aap sun sakeñge rūdād-e-yās-o-hasrat

kyā aap ko sunā.ūñ afsāna zindagī kā

aao ki be-tumhāre dam ruk gayā hai lab par

kyoñ tuul kar rahī ho afsāna zindagī kā

ḳhud mere chārāgar kā chehra utar chalā hai

ab de fareb mujh ko duniyā na zindagī kā

aao ki aa rahe haiñ ab naza.a ke pasīne

ya.anī chhalak chalā hai paimāna zindagī kā

tum bhī ho kuchh ḳhajil se merā bhī ruk chalā dam

kah do to ḳhatm kar duuñ afsāna zindagī kā

dāman pe gir rahe haiñ ai 'abr' ashk-e-rañgīñ

likhtā huuñ ḳhūn-e-dil se afsāna zindagī kā

labrez ho chuka hai paimana zindagi ka

sun jao ab bhi aa kar afsana zindagi ka

jab haal aap hi ne puchha na zindagi ka

phir kis ko hum sunaen afsana zindagi ka

ab hum hain aur zalim teri gali ke chakkar

gardish mein aa gaya hai paimana zindagi ka

kya aap sun sakenge rudad-e-yas-o-hasrat

kya aap ko sunaun afsana zindagi ka

aao ki be-tumhaare dam ruk gaya hai lab par

kyon tul kar rahi ho afsana zindagi ka

KHud mere chaaragar ka chehra utar chala hai

ab de fareb mujh ko duniya na zindagi ka

aao ki aa rahe hain ab naza ke pasine

yani chhalak chala hai paimana zindagi ka

tum bhi ho kuchh KHajil se mera bhi ruk chala dam

kah do to KHatm kar dun afsana zindagi ka

daman pe gir rahe hain ai 'abr' ashk-e-rangin

likhta hun KHun-e-dil se afsana zindagi ka