laDta hai mushkil se par mushkil-kusha hota nahin

laḌtā hai mushkil se par mushkil-kushā hotā nahīñ

aadmī insān hotā hai ḳhudā hotā nahīñ

qasr-e-irfāñ meñ rasā.ī paate haiñ arbāb-e-dil

har bashar ke vāste dar us kā vā hotā nahīñ

chashma-sār-e-nūr meñ umr-e-abad kī kar talāsh

chāh-e-tārīkī meñ ab āb-e-baqā hotā nahīñ

is haqīqat ko na samjheñge ye ḳhvāhān-e-bahisht

kāsa-e-daryūza har dast-e-duā hotā nahīñ

har-nafas se mil nahīñ saktī hai be-jānoñ ko jaan

haath har insān kā dast-e-shifā hotā nahīñ

hai falak par mamba.a-e-anvār tanhā āftāb

har sitāra charḳh par zulmat-rubā hotā nahīñ

ziist ke sāhil-nashīñ ye bhī hai ik shakl-e-sarāb

halqa-e-girdāb-e-dariyā naqsh-e-pā hotā nahīñ

kartā hai koshish to apnī sī har insāñ tā-ba-umr

haq to ye hai zindagī kā haq adā hotā nahīñ

asl fidya sirf ehsās-e-nadāmat hai 'valī'

sīm-o-zar yā sar kisī kā ḳhūñ-bahā hotā nahīñ

laDta hai mushkil se par mushkil-kusha hota nahin

aadmi insan hota hai KHuda hota nahin

qasr-e-irfan mein rasai pate hain arbab-e-dil

har bashar ke waste dar us ka wa hota nahin

chashma-sar-e-nur mein umr-e-abad ki kar talash

chah-e-tariki mein ab aab-e-baqa hota nahin

is haqiqat ko na samjhenge ye KHwahan-e-bahisht

kasa-e-daryuza har dast-e-dua hota nahin

har-nafas se mil nahin sakti hai be-jaanon ko jaan

hath har insan ka dast-e-shifa hota nahin

hai falak par mamba-e-anwar tanha aaftab

har sitara charKH par zulmat-ruba hota nahin

zist ke sahil-nashin ye bhi hai ek shakl-e-sarab

halqa-e-girdab-e-dariya naqsh-e-pa hota nahin

karta hai koshish to apni si har insan ta-ba-umr

haq to ye hai zindagi ka haq ada hota nahin

asl fidya sirf ehsas-e-nadamat hai 'wali'

sim-o-zar ya sar kisi ka KHun-baha hota nahin