laDta hun bhanwar se abhi Duba to nahin hun

laḌtā huuñ bhañvar se abhī Duubā to nahīñ huuñ

sāgar meñ samā jā.ūñ vo qatra to nahīñ huuñ

maiñ apnī tarah huuñ tire jaisā to nahīñ huuñ

bāzār meñ biktā huā saudā to nahīñ huuñ

akkās hai ā.īna abhī merī anā kā

TuuTā huuñ magar TuuT ke bikhrā to nahīñ huuñ

phir se isī maidān meñ ā.ūñgā palaT kar

kuchh pīchhe sarak aaya huuñ haarā to nahīñ huuñ

maiñ ḳhvāb bhī dekhūñ to ḳhafā rahte haiñ kuchh log

logo maiñ tumheñ ḳhvāb dikhātā to nahīñ huuñ

kuchh der ko dam le lo mire paas to aao

girtī huī dīvār kā saaya to nahīñ huuñ

kyoñ itne ḳhafā ho mirī itnī sī ḳhatā par

insān huuñ maiñ koī farishta to nahīñ huuñ

sar par mire bosīda sī Topī hai mirī hai

maiñ taaj sā darbār meñ sajtā to nahīñ huuñ

laDta hun bhanwar se abhi Duba to nahin hun

sagar mein sama jaun wo qatra to nahin hun

main apni tarah hun tere jaisa to nahin hun

bazar mein bikta hua sauda to nahin hun

akkas hai aaina abhi meri ana ka

TuTa hun magar TuT ke bikhra to nahin hun

phir se isi maidan mein aaunga palaT kar

kuchh pichhe sarak aaya hun haara to nahin hun

main KHwab bhi dekhun to KHafa rahte hain kuchh log

logo main tumhein KHwab dikhata to nahin hun

kuchh der ko dam le lo mere pas to aao

girti hui diwar ka saya to nahin hun

kyon itne KHafa ho meri itni si KHata par

insan hun main koi farishta to nahin hun

sar par mere bosida si Topi hai meri hai

main taj sa darbar mein sajta to nahin hun