lafz dekhenge maani ki taraf dekhenge

lafz dekheñge ma.ānī kī taraf dekheñge

phir dar-o-bast-o-ravānī kī taraf dekheñge

bahr-e-zulmāt meñ DhūñDeñge jazīroñ ke nishāñ

aur sahrāoñ meñ paanī kī taraf dekheñge

log pūchheñge zamāne kī zalālat kā ilaaj

aur ham sab'-e-masānī kī taraf dekheñge

raat aa.egī to nīñdoñ ke safar se pahle

raḳht bāñdhe hue naanī kī taraf dekheñge

ab talak TuuTā nahīñ pahlī mohabbat kā fusūñ

tujh ko bhūleñge to saanī kī taraf dekheñge

ham kisī zulf kī ḳhushbū se mahakte hue log

ham kahāñ raat kī raanī kī taraf dekheñge

ek tasvīr meñ dekheñge akelā ḳhud ko

aur phir apnī kahānī kī taraf dekheñge

ab tujhe dekh ke rone kī sakat kis ko hai

umr-bhar terī nishānī kī taraf dekheñge

lafz dekhenge maani ki taraf dekhenge

phir dar-o-bast-o-rawani ki taraf dekhenge

bahr-e-zulmat mein DhunDenge jaziron ke nishan

aur sahraon mein pani ki taraf dekhenge

log puchhenge zamane ki zalalat ka ilaj

aur hum sab'-e-masani ki taraf dekhenge

raat aaegi to nindon ke safar se pahle

raKHt bandhe hue nani ki taraf dekhenge

ab talak TuTa nahin pahli mohabbat ka fusun

tujh ko bhulenge to sani ki taraf dekhenge

hum kisi zulf ki KHushbu se mahakte hue log

hum kahan raat ki rani ki taraf dekhenge

ek taswir mein dekhenge akela KHud ko

aur phir apni kahani ki taraf dekhenge

ab tujhe dekh ke rone ki sakat kis ko hai

umr-bhar teri nishani ki taraf dekhenge