lafz KHushbu mein Dhaalta manzar

lafz ḳhushbū meñ Dhāltā manzar

lījiye sher ban gayā manzar

kaisā sundar thā ik zamāne meñ

terī āñkhoñ meñ Dūbtā manzar

rañg mausam se uḌ ga.e saare

canvas par paḌā rahā manzar

aap kā jism bhī hai miTTī kā

ek nāzuk sā bhurbhurā manzar

mujh ko hairat se maar Dālegā

aa.ine meñ sajā huā manzar

aah kamre meñ jāgte rahnā

aah khiḌkī meñ so gayā manzar

us ne dāman jhaTak liyā tauba

mere hāthoñ se gir gayā manzar

tum yahāñ the to thā yahīñ par vo

phir daraḳhtoñ meñ jā chhupā manzar

koī āvāz phir se gūñjī hai

ho gayā phir harā-bharā manzar

kis kī aahaT hai suunī galiyoñ meñ

kis kā khultā hai raat kā manzar

koī muflis kī pūñjī ho jaise

joḌtī huuñ zarā zarā manzar

lafz KHushbu mein Dhaalta manzar

lijiye sher ban gaya manzar

kaisa sundar tha ek zamane mein

teri aankhon mein Dubta manzar

rang mausam se uD gae sare

canwas par paDa raha manzar

aap ka jism bhi hai miTTi ka

ek nazuk sa bhurbhura manzar

mujh ko hairat se mar Dalega

aaine mein saja hua manzar

aah kamre mein jagte rahna

aah khiDki mein so gaya manzar

us ne daman jhaTak liya tauba

mere hathon se gir gaya manzar

tum yahan the to tha yahin par wo

phir daraKHton mein ja chhupa manzar

koi aawaz phir se gunji hai

ho gaya phir hara-bhara manzar

kis ki aahaT hai suni galiyon mein

kis ka khulta hai raat ka manzar

koi muflis ki punji ho jaise

joDti hun zara zara manzar