lafz nagin ki tarah Daste hain goyai mein

lafz nāgin kī tarah Daste haiñ goyā.ī meñ

ḳhāmushī zahr milā detī hai tanhā.ī meñ

dil kī bātoñ ko zabāñ par nahīñ aane dete

kitnī zanjīreñ nazar aatī haiñ yakjā.ī meñ

Thahre paanī meñ girā sañg ravānī koī

chāhiye taaza huā ruuh kī gahrā.ī meñ

kyā nazar aa.egā mausam ke nashe meñ tujh ko

kitne patte haiñ ki uḌ jaate haiñ purvā.ī meñ

shab se pahle hī koī chāñd nikālo varna

dil bhī niklegā añdheroñ kī pazīrā.ī meñ

khul ga.ī aañkh to ḳhauf aane lagā hai ḳhud se

ġham na ho jaa.eñ kahīñ apnī hī pahnā.ī meñ

kis ke nazāre kī ḳhvāhish meñ giraftār hue

zaḳhm āñkhoñ ke mile dil kī masīhā.ī meñ

Duub kar phir koī ubhrā na safīna ġham kā

kitne tūfāñ haiñ tire jism kī ra.anā.ī meñ

mujh se pūchho ki bayābān-e-safar kaisā hai

umr guzrī hai mirī bādiya-paimā.ī meñ

ham bhī mar jā.eñge jiine kī havas meñ āḳhir

kaam ā.eñge usī ma.arka-ārā.ī meñ

hañsne vāloñ meñ ka.ī apne bhī shāmil the 'nadīm'

shakl pahchānī ga.ī apnī bhī rusvā.ī meñ

lafz nagin ki tarah Daste hain goyai mein

KHamushi zahr mila deti hai tanhai mein

dil ki baaton ko zaban par nahin aane dete

kitni zanjiren nazar aati hain yakjai mein

Thahre pani mein gira sang rawani koi

chahiye taza hua ruh ki gahrai mein

kya nazar aaega mausam ke nashe mein tujh ko

kitne patte hain ki uD jate hain purwai mein

shab se pahle hi koi chand nikalo warna

dil bhi niklega andheron ki pazirai mein

khul gai aankh to KHauf aane laga hai KHud se

gham na ho jaen kahin apni hi pahnai mein

kis ke nazare ki KHwahish mein giraftar hue

zaKHm aankhon ke mile dil ki masihai mein

Dub kar phir koi ubhra na safina gham ka

kitne tufan hain tere jism ki ranai mein

mujh se puchho ki bayaban-e-safar kaisa hai

umr guzri hai meri baadiya-paimai mein

hum bhi mar jaenge jine ki hawas mein aaKHir

kaam aaenge usi marka-arai mein

hansne walon mein kai apne bhi shamil the 'nadim'

shakl pahchani gai apni bhi ruswai mein