lafz-o-bayan ke pas-manzar tak ek qaus-e-imkani aur

lafz-o-bayāñ ke pas-manzar tak ik qaus-e-imkānī aur

merī jast-e-hunar ko likh de koī samt-e-ma.ānī aur

bast-o-kushād-bāzad kyā hai sāñsoñ kī halchal ke sivā

chāñd ghirā ho jab maujoñ meñ baḌhtī hai tuġhyānī aur

sehr-e-savād-e-bahr-o-bar se kitne tūfāñ ubharte haiñ

ab is shorish-e-āb-o-gil ko miTTī aur na paanī aur

dasht-e-navā par chhā jā.egā is ke ba.ad ik lambā sukūt

maiñ chauthā darvesh huuñ mujh se sun lo ek kahānī aur

maiñ huuñ ġhazāl-e-mushk-gazīda merā safar hai tiir ke saath

jab hotī hai niiz ye ḳhushbū baḌhtī hai jaulānī aur

umr ke ġharb-e-siyah meñ kaisā Duub rahā hai mehr-e-shabāb

dekh sako to dekh lo dam-bhar 'ramz' ye shaam suhānī aur

lafz-o-bayan ke pas-manzar tak ek qaus-e-imkani aur

meri jast-e-hunar ko likh de koi samt-e-maani aur

bast-o-kushad-bazad kya hai sanson ki halchal ke siwa

chand ghira ho jab maujon mein baDhti hai tughyani aur

sehr-e-sawad-e-bahr-o-bar se kitne tufan ubharte hain

ab is shorish-e-ab-o-gil ko miTTi aur na pani aur

dasht-e-nawa par chha jaega is ke baad ek lamba sukut

main chautha darwesh hun mujh se sun lo ek kahani aur

main hun ghazal-e-mushk-gazida mera safar hai tir ke sath

jab hoti hai niz ye KHushbu baDhti hai jaulani aur

umr ke gharb-e-siyah mein kaisa Dub raha hai mehr-e-shabab

dekh sako to dekh lo dam-bhar 'ramz' ye sham suhani aur