lafz raushan karne ke laenge jab andaz hum

lafz raushan karne ke lā.eñge jab andāz ham

ahl-e-'ilm-o-fan meñ hoñge sāhib-e-e'zāz ham

har taraf bikhrā huā hai naġhma-e-āh-o-fuġhāñ

kaash ban jaa.eñ jahāñ meñ dard kī āvāz ham

āmad-e-ḳhurshīd-e-'ālam hai agar apnī fanā

kirmak-e-shab-tāb haiñ karte haiñ is par naaz ham

āsmānoñ ko musaḳhḳhar ham kareñge ek din

bāl-o-par meñ pā.eñge vo quvvat-e-parvāz ham

ham ko baḳhshī hai ḳhudā ne sūrat-e-dast-e-hunar

mamba'-e-jūd-o-saḳhā haiñ faiz kā āġhāz ham

hai judāgāna ravish fikr-e-suḳhan tarz-e-bayāñ

apne ham-‘asroñ meñ rahte haiñ bahut mumtāz ham

mustaqil karte raheñge koshish-e-tarz-e-kalām

pā.eñge 'ashraf' yaqīnan nutq kā e'jāz ham

lafz raushan karne ke laenge jab andaz hum

ahl-e-'ilm-o-fan mein honge sahib-e-e'zaz hum

har taraf bikhra hua hai naghma-e-ah-o-fughan

kash ban jaen jahan mein dard ki aawaz hum

aamad-e-KHurshid-e-'alam hai agar apni fana

kirmak-e-shab-tab hain karte hain is par naz hum

aasmanon ko musaKHKHar hum karenge ek din

baal-o-par mein paenge wo quwwat-e-parwaz hum

hum ko baKHshi hai KHuda ne surat-e-dast-e-hunar

mamba'-e-jud-o-saKHa hain faiz ka aaghaz hum

hai judagana rawish fikr-e-suKHan tarz-e-bayan

apne ham-‘asron mein rahte hain bahut mumtaz hum

mustaqil karte rahenge koshish-e-tarz-e-kalam

paenge 'ashraf' yaqinan nutq ka e'jaz hum