lafzon ke talatum mein aahang jaga baiThe

lafzoñ ke talātum meñ āhang jagā baiThe

tum ne to ġhazal gaa.ī ham hosh bhulā baiThe

aisī bhī shikāyat kyā bebāk-nigāhī se

ā.īna dikhāyā thā chehra hī chhupā baiThe

kyā kyā na gumāñ guzrā kyā kyā na ḳhayāl aaya

kyā kyā na banī dil par ham phone uThā baiThe

ai vaa.e vo nādānī ai vaa.e ye dānā.ī

duniyā ne to kyā luuTā ham ḳhud ko luTā baiThe

kyā kyā na zamāne ke dāman se havā bhaḌkī

chhāñv thī zarā ThanDī ham dhuup meñ jā baiThe

ayyām ke chehre ko jab dhuup jhulastī ho

kohrā.ī sī yādoñ kī ham sham.a jalā baiThe

armān machalte haiñ lahroñ kī nigāhoñ meñ

ham vaqt ke sāhil par do phuul khilā baiThe

kuchh baat rahī hogī kuchh DaañT paḌī hogī

vo ro.e the ham us din us ko hī rulā baiThe

phūloñ kī balā.eñ lo kāñToñ ko duā.eñ do

gulshan kī adāoñ ko kyā dil se lagā baiThe

lafzon ke talatum mein aahang jaga baiThe

tum ne to ghazal gai hum hosh bhula baiThe

aisi bhi shikayat kya bebak-nigahi se

aaina dikhaya tha chehra hi chhupa baiThe

kya kya na guman guzra kya kya na KHayal aaya

kya kya na bani dil par hum phone uTha baiThe

ai wae wo nadani ai wae ye danai

duniya ne to kya luTa hum KHud ko luTa baiThe

kya kya na zamane ke daman se hawa bhaDki

chhanw thi zara ThanDi hum dhup mein ja baiThe

ayyam ke chehre ko jab dhup jhulasti ho

kohrai si yaadon ki hum shama jala baiThe

arman machalte hain lahron ki nigahon mein

hum waqt ke sahil par do phul khila baiThe

kuchh baat rahi hogi kuchh DanT paDi hogi

wo roe the hum us din us ko hi rula baiThe

phulon ki balaen lo kanTon ko duaen do

gulshan ki adaon ko kya dil se laga baiThe