lafzon se taswir banate rahte hain

lafzoñ se tasvīr banāte rahte haiñ

jaise-taise jī bahlāte rahte haiñ

qatre meñ dariyā kā jab dīdār huā

ham dāman ke daaġh dikhāte rahte haiñ

un se shāyad janm janm kā rishta hai

peḌ parinde hameñ bulāte rahte haiñ

jab se chehrā dekhā un kī āñkhoñ meñ

ā.īne se aañkh churāte rahte haiñ

bārish panchhī ḳhushbū jharnā phuul charāġh

ham ko kyā kyā yaad dilāte rahte haiñ

un ke dil meñ ḳhvāhish kyoñ ho sāhil kī

tūfānoñ se jo Takrāte rahte haiñ

jin se phal aur saaya milnā mushkil hai

ham aise bhī peḌ lagāte rahte haiñ

naqsh-e-pā se bach kar chaltā huuñ aksar

ye rasta dushvār banāte rahte haiñ

ik na ik din jab bujhnā hai sab ko 'nisār'

kyoñ āñdhī se log Darāte rahte haiñ

lafzon se taswir banate rahte hain

jaise-taise ji bahlate rahte hain

qatre mein dariya ka jab didar hua

hum daman ke dagh dikhate rahte hain

un se shayad janm janm ka rishta hai

peD parinde hamein bulate rahte hain

jab se chehra dekha un ki aankhon mein

aaine se aankh churaate rahte hain

barish panchhi KHushbu jharna phul charagh

hum ko kya kya yaad dilate rahte hain

un ke dil mein KHwahish kyon ho sahil ki

tufanon se jo Takraate rahte hain

jin se phal aur saya milna mushkil hai

hum aise bhi peD lagate rahte hain

naqsh-e-pa se bach kar chalta hun aksar

ye rasta dushwar banate rahte hain

ek na ek din jab bujhna hai sab ko 'nisar'

kyon aandhi se log Daraate rahte hain