lag gai aag tabassum ke sharar hone tak

lag ga.ī aag tabassum ke sharar hone tak

dil jigar daaġh bane chashm ke tar hone tak

zulmat-e-shab meñ harīfoñ se yahī kahnā thā

na sahar hogī kabhī ḳhūn-e-jigar hone tak

vaqt ne sāmne dīvār khaḌī kar dī hai

kyoñ na ḳhāmosh rahe 'ishq sahar hone tak

bazm-e-jānāñ kā sitam bazm-e-harīfāñ kā ḳhatar

jaa.eñ to jaa.eñ kahāñ 'umr basar hone tak

lafz ke shīshagaro zeb nahīñ sang-e-anā

guftugū narm rahe ḳhatm-e-safar hone tak

shauq-e-dīdār uThā degā hijābāt-e-nazar

diid hotī hī nahīñ husn-e-nazar hone tak

khīñch laa.ī hai kahāñ ham ko tirī yaad 'adīb'

luT ga.e raah meñ ham tujh ko ḳhabar hone tak

lag gai aag tabassum ke sharar hone tak

dil jigar dagh bane chashm ke tar hone tak

zulmat-e-shab mein harifon se yahi kahna tha

na sahar hogi kabhi KHun-e-jigar hone tak

waqt ne samne diwar khaDi kar di hai

kyon na KHamosh rahe 'ishq sahar hone tak

bazm-e-jaanan ka sitam bazm-e-harifan ka KHatar

jaen to jaen kahan 'umr basar hone tak

lafz ke shishagaro zeb nahin sang-e-ana

guftugu narm rahe KHatm-e-safar hone tak

shauq-e-didar uTha dega hijabaat-e-nazar

did hoti hi nahin husn-e-nazar hone tak

khinch lai hai kahan hum ko teri yaad 'adib'

luT gae rah mein hum tujh ko KHabar hone tak