lag raha hai aaj mere dil mein aisa shor hai

lag rahā hai aaj mere dil meñ aisā shor hai

har taraf bādal haiñ kaale aur barpā shor hai

zehn ke ḳhālī darīchoñ se koī jhāñkā ki ab

paañv rakhtī huuñ uThātī huuñ to uThtā shor hai

ġham lagī jab bāñTne to dil yahī kahne lagā

raaz ifshā na karo duniyā meñ barpā shor hai

dil samundar aur pyāsā sāniha kuchh hai 'ajab

ḳhvāhishoñ kī pyaas dekho hashr jaisā shor hai

hai ḳhushī hī ibtidā aur ġham hai is kī intihā

kaisā phir karb-e-musalsal phir ye kaisā shor hai

maiñ huuñ chehra vaqt kā aur hausle dekho zarā

habs hai chāroñ taraf aur bārishoñ kā shor hai

sab parinde bach ga.e haiñ mausamoñ kī gard se

ab 'bahār'-e-gulsitāñ aa.ī ye uThtā shor hai

lag raha hai aaj mere dil mein aisa shor hai

har taraf baadal hain kale aur barpa shor hai

zehn ke KHali darichon se koi jhanka ki ab

panw rakhti hun uThati hun to uThta shor hai

gham lagi jab banTne to dil yahi kahne laga

raaz ifsha na karo duniya mein barpa shor hai

dil samundar aur pyasa saniha kuchh hai 'ajab

KHwahishon ki pyas dekho hashr jaisa shor hai

hai KHushi hi ibtida aur gham hai is ki intiha

kaisa phir karb-e-musalsal phir ye kaisa shor hai

main hun chehra waqt ka aur hausle dekho zara

habs hai chaaron taraf aur barishon ka shor hai

sab parinde bach gae hain mausamon ki gard se

ab 'bahaar'-e-gulsitan aai ye uThta shor hai