laga ki jaise kisi kanpte hiran ko chhua

lagā ki jaise kisī kāñpte hiran ko chhuā

hamāre hāthoñ ne jab phuul se badan ko chhuā

tamām jism meñ āsūdgī sī phail ga.ī

tire dahan ne kabhī jab mire dahan ko chhuā

simaT ke aa ga.ī kāġhaz pe sūrat-e-ash.ār

hamārī fikr ne jab bhī kisī ghuTan ko chhuā

ka.ī maqām pe donoñ mile zarūr magar

kishan ne rādhā ko rādhā ne kab kishan ko chhuā

lipaT ke pahuñchā maiñ jab nekiyoñ kī ḳhushbū meñ

lahad kī miTTī ne Darte hue kafan ko chhuā

kabhī na ho sakī iz.hār-e-ishq kī jur.at

ye aur baat ka.ī sūratoñ ne man ko chhuā

ham apnī jaan bhī kar deñge 'faiz' us pe nisār

agar kisī ne kabhī azmat-e-vatan ko chhuā

laga ki jaise kisi kanpte hiran ko chhua

hamare hathon ne jab phul se badan ko chhua

tamam jism mein aasudgi si phail gai

tere dahan ne kabhi jab mere dahan ko chhua

simaT ke aa gai kaghaz pe surat-e-ashaar

hamari fikr ne jab bhi kisi ghuTan ko chhua

kai maqam pe donon mile zarur magar

kishan ne radha ko radha ne kab kishan ko chhua

lipaT ke pahuncha main jab nekiyon ki KHushbu mein

lahad ki miTTi ne Darte hue kafan ko chhua

kabhi na ho saki izhaar-e-ishq ki jurat

ye aur baat kai suraton ne man ko chhua

hum apni jaan bhi kar denge 'faiz' us pe nisar

agar kisi ne kabhi azmat-e-watan ko chhua