laga majnun ko zahr-e-ishq kya aab-e-baqa ho kar

lagā majnūñ ko zahr-e-ishq kyā āb-e-baqā ho kar

vo zinda ho gayā goyā mohabbat meñ fanā ho kar

bane the mehmāñ āġhāz-e-ulfat meñ mire dil meñ

makīn-e-mustaqil ab ban ga.e shīrīñ-adā ho kar

miTāte jo rahe mujh ko mujassam zulm ban ban kar

unhīñ ke dil pe maiñ ubhrā kiyā naqsh-e-vafā ho kar

unhīñ ko jalva-rezī ban ga.ī thī chāñdnī ġham kī

ufuq pe dil kī vo chamkā kiye māh-e-azā ho kar

kuchh aisī thī kashish mujh meñ ḳhirāj-e-husn bhī paayā

huā mash.hūr maiñ ishq-o-mohabbat kā ḳhudā ho kar

Thikāna yād-e-māzī kā agar hai to mirā dil hai

kahāñ par jā.eñgī 'sartāj' vo dil se judā ho kar

laga majnun ko zahr-e-ishq kya aab-e-baqa ho kar

wo zinda ho gaya goya mohabbat mein fana ho kar

bane the mehman aaghaz-e-ulfat mein mere dil mein

makin-e-mustaqil ab ban gae shirin-ada ho kar

miTate jo rahe mujh ko mujassam zulm ban ban kar

unhin ke dil pe main ubhra kiya naqsh-e-wafa ho kar

unhin ko jalwa-rezi ban gai thi chandni gham ki

ufuq pe dil ki wo chamka kiye mah-e-aza ho kar

kuchh aisi thi kashish mujh mein KHiraj-e-husn bhi paya

hua mashhur main ishq-o-mohabbat ka KHuda ho kar

Thikana yaad-e-mazi ka agar hai to mera dil hai

kahan par jaengi 'sartaj' wo dil se juda ho kar