laga tha yun kisi unchi uDan se utre

lagā thā yuuñ kisī ūñchī uḌaan se utre

tasavvurāt ke jab lā-makān se utre

shajar kī bāñhoñ meñ soī havā ko na chheḌo

thakan kā bojh to kuchh jism-o-jān se utre

maiñ dekh to luuñ zamāne ke tevaroñ kā rang

vo thoḌī der ko hī mere dhyān se utre

chamak ke ḳhushiyoñ kā sūraj bhī thak gayā āḳhir

udāsiyoñ ke na saa.e makān se utre

anā yuuñ ghaat meñ baiThī rahegī kitnī der

kabhī to mere badan ke machān se utre

bulandiyoñ kī masāfat kā dam nahīñ mujh meñ

mire liye koī chashma chaTān se utre

gulāb-rut meñ bhī itnī udāsiyāñ 'farhat'

tire liye to iram āsmān se utre

laga tha yun kisi unchi uDan se utre

tasawwuraat ke jab la-makan se utre

shajar ki banhon mein soi hawa ko na chheDo

thakan ka bojh to kuchh jism-o-jaan se utre

main dekh to lun zamane ke tewaron ka rang

wo thoDi der ko hi mere dhyan se utre

chamak ke KHushiyon ka suraj bhi thak gaya aaKHir

udasiyon ke na sae makan se utre

ana yun ghat mein baiThi rahegi kitni der

kabhi to mere badan ke machan se utre

bulandiyon ki masafat ka dam nahin mujh mein

mere liye koi chashma chaTan se utre

gulab-rut mein bhi itni udasiyan 'farhat'

tere liye to iram aasman se utre