لگا تھا یوں کسی اونچی اڑان سے اترے

لگا تھا یوں کسی اونچی اڑان سے اترے

تصورات کے جب لا مکان سے اترے

شجر کی بانہوں میں سوئی ہوا کو نہ چھیڑو

تھکن کا بوجھ تو کچھ جسم و جان سے اترے

میں دیکھ تو لوں زمانے کے تیوروں کا رنگ

وہ تھوڑی دیر کو ہی میرے دھیان سے اترے

چمک کے خوشیوں کا سورج بھی تھک گیا آخر

اداسیوں کے نہ سائے مکان سے اترے

انا یوں گھات میں بیٹھی رہے گی کتنی دیر

کبھی تو میرے بدن کے مچان سے اترے

بلندیوں کی مسافت کا دم نہیں مجھ میں

مرے لئے کوئی چشمہ چٹان سے اترے

گلاب رت میں بھی اتنی اداسیاں فرحتؔ

ترے لئے تو ارم آسمان سے اترے