lage hue hain zamane ke intizam mein hum

lage hue haiñ zamāne ke intizām meñ ham

kabhī ḳhavās meñ shāmil kabhī avaam meñ ham

pukārte haiñ butoñ ko ḳhudā ke naam se ham

gunāh karte haiñ aur kitne ehtimām meñ ham

phir us kā daḳhl bhī kyuuñ ho hamāre kāmoñ meñ

mudāḳhalat nahīñ karte ḳhudā ke kaam meñ ham

panāh māñgtī hai dhaar teġh-e-ma.anī kī

vo kaaT rakhte haiñ alfāz-e-be-niyām meñ ham

ab āftāb se mahtāb ban ga.e hoñge

nazar na ā.eñge lekin ġhubār-e-shām meñ ham

nigāh us kī mirī samt chehra aur taraf

so chuuk jaate haiñ andāza-e-salām meñ ham

mirī namāz kī raftār par nazar rakkho

rukū-o-sajde meñ haiñ aur na haiñ qayām meñ ham

sabhī samā.ateñ āñkhoñ ko khol kar rakheñ

chamak uTheñge achānak kisī kalām meñ ham

achānak aate haiñ girdāb jaise dariyā meñ

ik inqalāb kī āñkheñ liye avaam meñ ham

ḳhud apne jism kī be-hurmatī bhī karte rahe

fanā bhī hote rahe koshish-e-davām meñ ham

hameñ bhī daḳhl hai kuchh kār-gāh-e-ālam meñ

har ek kaam ke bāhar har ek kaam meñ ham

hamārā naam to hai qais-e-sākin-e-sahrā

pukāre jaate haiñ 'ehsās' urf-e-ām meñ ham

lage hue hain zamane ke intizam mein hum

kabhi KHawas mein shamil kabhi awam mein hum

pukarte hain buton ko KHuda ke nam se hum

gunah karte hain aur kitne ehtimam mein hum

phir us ka daKHl bhi kyun ho hamare kaamon mein

mudaKHalat nahin karte KHuda ke kaam mein hum

panah mangti hai dhaar tegh-e-mani ki

wo kaT rakhte hain alfaz-e-be-niyam mein hum

ab aaftab se mahtab ban gae honge

nazar na aaenge lekin ghubar-e-sham mein hum

nigah us ki meri samt chehra aur taraf

so chuk jate hain andaza-e-salam mein hum

meri namaz ki raftar par nazar rakkho

ruku-o-sajde mein hain aur na hain qayam mein hum

sabhi samaaten aankhon ko khol kar rakhen

chamak uThenge achanak kisi kalam mein hum

achanak aate hain girdab jaise dariya mein

ek inqalab ki aankhen liye awam mein hum

KHud apne jism ki be-hurmati bhi karte rahe

fana bhi hote rahe koshish-e-dawam mein hum

hamein bhi daKHl hai kuchh kar-gah-e-alam mein

har ek kaam ke bahar har ek kaam mein hum

hamara nam to hai qais-e-sakin-e-sahra

pukare jate hain 'ehsas' urf-e-am mein hum