laghzish-e-gam liye laghzish-e-mastana liye

laġhzish-e-gām liye laġhzish-e-mastāna liye

aa.e ham bazm meñ phir jur.at-e-rindāna liye

ishq pahlū meñ hai phir jalva-e-jānāna liye

zulf ik haath meñ ik haath meñ paimāna liye

yaad kartā thā hameñ sāqī-o-mīnā kā hujūm

uTh ga.e the jo kabhī raunaq-e-mai-ḳhāna liye

vasl kī sub.h shab-e-hijr ke ba.ad aa.ī hai

āftāb-e-ruḳh-e-mahbūb kā nazrāna liye

asr-e-hāzir ko mubārak ho nayā daur-e-avām

apnī Thokar meñ sar-e-shaukat-e-shāhāna liye

laghzish-e-gam liye laghzish-e-mastana liye

aae hum bazm mein phir jurat-e-rindana liye

ishq pahlu mein hai phir jalwa-e-jaanana liye

zulf ek hath mein ek hath mein paimana liye

yaad karta tha hamein saqi-o-mina ka hujum

uTh gae the jo kabhi raunaq-e-mai-KHana liye

wasl ki subh shab-e-hijr ke baad aai hai

aaftab-e-ruKH-e-mahbub ka nazrana liye

asr-e-hazir ko mubarak ho naya daur-e-awam

apni Thokar mein sar-e-shaukat-e-shahana liye