laghzishen tanhaiyon ki sab bata di jaengi

laġhzisheñ tanhā.iyoñ kī sab batā dī jā.eñgī

rañgateñ chehroñ kī is sūrat uḌā dī jā.eñgī

ḳhushk peḌoñ par na.e mausam ugāne ke liye

zard pattoñ kī ye tahrīreñ miTā dī jā.eñgī

qaht nīñdoñ kā paḌegā chāhatoñ ke khet meñ

ḳhvāb kī fasleñ agar saarī jalā dī jā.egī

in sarāboñ meñ muqayyad mujh se qaidī ke liye

kyā fasīleñ ret kī ūñchī uThā dī jā.eñgī

phir samundar ke makānoñ kā bhī leñge jā.eza

sīḌhiyāñ paanī kī tah tak jab banā dī jā.eñgī

kyā ḳhabar thī shak kī ḳhātir dostī ke naam par

aaj apnī āstīneñ bhī dikhā dī jā.eñgī

jā.eza jab mere ghar kā lene vo aa.e 'jamāl'

TuuTī phūTī hāñDiyāñ bhī khankhanā dī jā.eñgī

laghzishen tanhaiyon ki sab bata di jaengi

rangaten chehron ki is surat uDa di jaengi

KHushk peDon par nae mausam ugane ke liye

zard patton ki ye tahriren miTa di jaengi

qaht nindon ka paDega chahaton ke khet mein

KHwab ki faslen agar sari jala di jaegi

in sarabon mein muqayyad mujh se qaidi ke liye

kya fasilen ret ki unchi uTha di jaengi

phir samundar ke makanon ka bhi lenge jaeza

siDhiyan pani ki tah tak jab bana di jaengi

kya KHabar thi shak ki KHatir dosti ke nam par

aaj apni aastinen bhi dikha di jaengi

jaeza jab mere ghar ka lene wo aae 'jamal'

TuTi phuTi hanDiyan bhi khankhana di jaengi