lahad se munh chhupa kar roegi bimar ki hasrat

lahad se muñh chhupā kar ro.egī bīmār kī hasrat

vo hasrat uf re hasrat lazzat-e-āzār kī hasrat

qayāmat hai junūn-e-shauq-e-āfat-kār kī hasrat

sar-e-shorīda ko mahshar meñ hai dīvār kī hasrat

abhī hai jalva-e-yaktā hijāb-e-lan-tarānī meñ

kahāñ se aa ga.ī hai biich meñ takrār kī hasrat

kisī kī jaan niklegī kisī ke kaam nikleñge

mire ġham se hai vābasta mire ġham-ḳhvār kī hasrat

mire gosh-e-tamanna par bhī āḳhir rahm farmāo

ki maiñ huuñ aur fareb-e-vāda-e-dīdār kī hasrat

dil-e-nākām miTte miTte bhī sau rang lā.egā

abhī bāzār meñ hai garmī-e-bāzār kī hasrat

badalnā karvaToñ kā qabr meñ dekho ki lipTī hai

kafan ke saath āġhosh-e-visāl-e-yār kī hasrat

sitam ai garmī-e-andesha misl-e-rūh ghultī hai

dil-e-ḳhūñ-gashta meñ tāb-e-nigāh-e-yār kī hasrat

halāk-e-sheva-hā-e-bevafā.ī huuñ samajhtā huuñ

na niklī bul-havas kī aarzū aġhyār kī hasrat

na chheḌ ai zauq-e-dard-e-jāñkanī ḳhāmosh rahne de

khaTak jaatī hai dil meñ tāla-e-bāzār kī hasrat

'vafā' ik dam kī fursat aur phir ye kashmakash hai hai

ḳhayāl-e-ḳhvāb hai aur dīda-e-bedār kī hasrat

lahad se munh chhupa kar roegi bimar ki hasrat

wo hasrat uf re hasrat lazzat-e-azar ki hasrat

qayamat hai junun-e-shauq-e-afat-kar ki hasrat

sar-e-shorida ko mahshar mein hai diwar ki hasrat

abhi hai jalwa-e-yakta hijab-e-lan-tarani mein

kahan se aa gai hai bich mein takrar ki hasrat

kisi ki jaan niklegi kisi ke kaam niklenge

mere gham se hai wabasta mere gham-KHwar ki hasrat

mere gosh-e-tamanna par bhi aaKHir rahm farmao

ki main hun aur fareb-e-wada-e-didar ki hasrat

dil-e-nakaam miTte miTte bhi sau rang laega

abhi bazar mein hai garmi-e-bazar ki hasrat

badalna karwaTon ka qabr mein dekho ki lipTi hai

kafan ke sath aaghosh-e-visal-e-yar ki hasrat

sitam ai garmi-e-andesha misl-e-ruh ghulti hai

dil-e-KHun-gashta mein tab-e-nigah-e-yar ki hasrat

halak-e-shewa-ha-e-bewafai hun samajhta hun

na nikli bul-hawas ki aarzu aghyar ki hasrat

na chheD ai zauq-e-dard-e-jaankani KHamosh rahne de

khaTak jati hai dil mein tala-e-bazar ki hasrat

'wafa' ek dam ki fursat aur phir ye kashmakash hai hai

KHayal-e-KHwab hai aur dida-e-bedar ki hasrat