lahje ka rang lafz ki KHushbu bhi dekh le

lahje kā rang lafz kī ḳhushbū bhī dekh le

aa mujh se kar kalām mujhe tū bhī dekh le

maiñ chaudhvīñ kā chāñd samundar tirā badan

merī kashish kā boltā jaadū bhī dekh le

khultā huuñ tere ruḳh kī sajal chāñdnī ke paas

pahchān le mujhe mirī ḳhushbū bhī dekh le

tū ḳhār-zār aur maiñ abr-e-barahna-pā

mere safar kā karb kabhī tū bhī dekh le

ik shab ridā-e-abr se bāhar nikal ke aa

kis kis ko hai nigāh pe qaabū bhī dekh le

mere lahū kī gūñjtī fariyād par na jā

āñkhoñ meñ apnī tairte aañsū bhī dekh le

manzil pe sirf chalte hue chāñd hī na dekh

chamke kahīñ jo raah meñ jugnū bhī dekh le

dast-e-sabā kī Therī huī loriyoñ se bach

dasht-e-vafā meñ chaltī huī lū bhī dekh le

ghere meñ āsmāñ ne tujhe le liyā to kyā

is daam se farār kā pahlū bhī dekh le

sachchā.ī kā 'alam tū uThātā to hai magar

kaTte haiñ is jihād meñ baazū bhī dekh le

barham hai roz-o-shab kā mizāj-e-sukūñ-pasand

bikhrā diye haiñ vaqt ne gesū bhī dekh le

gunjān pāniyoñ pe barasne se fā.eda

ai abr tishnagān-e-lab-e-jū bhī dekh le

'zulfī' jo mere tarz-e-adā kā asiir hai

vo kaash mere she'r kā jaadū bhī dekh le

lahje ka rang lafz ki KHushbu bhi dekh le

aa mujh se kar kalam mujhe tu bhi dekh le

main chaudhwin ka chand samundar tera badan

meri kashish ka bolta jadu bhi dekh le

khulta hun tere ruKH ki sajal chandni ke pas

pahchan le mujhe meri KHushbu bhi dekh le

tu KHar-zar aur main abr-e-barahna-pa

mere safar ka karb kabhi tu bhi dekh le

ek shab rida-e-abr se bahar nikal ke aa

kis kis ko hai nigah pe qabu bhi dekh le

mere lahu ki gunjti fariyaad par na ja

aankhon mein apni tairte aansu bhi dekh le

manzil pe sirf chalte hue chand hi na dekh

chamke kahin jo rah mein jugnu bhi dekh le

dast-e-saba ki Theri hui loriyon se bach

dasht-e-wafa mein chalti hui lu bhi dekh le

ghere mein aasman ne tujhe le liya to kya

is dam se farar ka pahlu bhi dekh le

sachchai ka 'alam tu uThata to hai magar

kaTte hain is jihad mein bazu bhi dekh le

barham hai roz-o-shab ka mizaj-e-sukun-pasand

bikhra diye hain waqt ne gesu bhi dekh le

gunjaan paniyon pe barasne se faeda

ai abr tishnagan-e-lab-e-ju bhi dekh le

'zulfi' jo mere tarz-e-ada ka asir hai

wo kash mere she'r ka jadu bhi dekh le