lahren kyon sakit-o-KHamosh hain socha jae

lahreñ kyoñ sākit-o-ḳhamosh haiñ sochā jaa.e

phir munāsib ho to kankar koī pheñkā jaa.e

is qadar jaur uThā.e haiñ ḳhizāñ ke hāthoñ

ham se ab mausam-e-gul meñ bhī na chahkā jaa.e

aur bhī kitne hī asbāb haiñ sarmastī ke

ye zarūrī nahīñ mai pī ke hī bahkā jaa.e

ā.īna husn-e-ḳhudā-dād kī kyā degā daad

is ko kuchh merī nigāhoñ se hī dekhā jaa.e

jin meñ tahrīr hoñ āyāt-e-mohabbat yaaro

un sahīfoñ ko na bāzār meñ bechā jaa.e

dil meñ hotī hai jo mahsūs ye halkī sī ḳhalish

dosto is kā koī naam to rakhā jaa.e

aisā ḳhushbū se bharā zaḳhm mujhe de diije

har qadam par jo rah-e-zīst ko mahkā jaa.e

sher kahne kā faqat itnā hī maqsad hai 'nadīm'

anjuman vāloñ ke me.aar ko parkhā jaa.e

lahren kyon sakit-o-KHamosh hain socha jae

phir munasib ho to kankar koi phenka jae

is qadar jaur uThae hain KHizan ke hathon

hum se ab mausam-e-gul mein bhi na chahka jae

aur bhi kitne hi asbab hain sarmasti ke

ye zaruri nahin mai pi ke hi bahka jae

aaina husn-e-KHuda-dad ki kya dega dad

is ko kuchh meri nigahon se hi dekha jae

jin mein tahrir hon aayat-e-mohabbat yaro

un sahifon ko na bazar mein becha jae

dil mein hoti hai jo mahsus ye halki si KHalish

dosto is ka koi nam to rakha jae

aisa KHushbu se bhara zaKHm mujhe de dije

har qadam par jo rah-e-zist ko mahka jae

sher kahne ka faqat itna hi maqsad hai 'nadim'

anjuman walon ke mear ko parkha jae