lahron ke musafir the kinaron ke makin the

lahroñ ke musāfir the kināroñ ke makīñ the

ham tīra-navard aise ki sub.hoñ ke makīñ the

ashkoñ ke libāde meñ nikal aa.e the ghar se

kuchh ḳhvāb pareshān sī āñkhoñ ke makīñ the

kuchh log qabīloñ kī rivāyāt se nikle

vo log jo sanglāḳh zamīnoñ ke makīñ the

is shahr ne fitrat pe baḌā zulm kiyā hai

ik chāñd thā kuchh phuul jo jhīloñ ke makīñ the

jiddat bharī duniyā meñ khaḌe soch rahe haiñ

tab ḳhuub the jab ham sabhī ġhāroñ ke makīñ the

ham log sitāroñ ko samajhte rahe 'sābir'

ham aise ki gum-gashta jazīroñ ke makīñ the

lahron ke musafir the kinaron ke makin the

hum tira-naward aise ki subhon ke makin the

ashkon ke libaade mein nikal aae the ghar se

kuchh KHwab pareshan si aankhon ke makin the

kuchh log qabilon ki riwayat se nikle

wo log jo sanglaKH zaminon ke makin the

is shahr ne fitrat pe baDa zulm kiya hai

ek chand tha kuchh phul jo jhilon ke makin the

jiddat bhari duniya mein khaDe soch rahe hain

tab KHub the jab hum sabhi ghaaron ke makin the

hum log sitaron ko samajhte rahe 'sabir'

hum aise ki gum-gashta jaziron ke makin the