lahron mein bhanwar niklenge mehwar na milega

lahroñ meñ bhañvar nikleñge mehvar na milegā

har mauj meñ paanī bhī barābar na milegā

gir jaatī hai roz ek parat raakh badan se

jalne kā samāñ phir bhī kahīñ par na milegā

chashmak bhī jo rakhnī hai to chauthā.ī zamīñ se

shorīda zabāñ kaise samundar na milegā

har samt dimāġhoñ ke tarañgoñ kā hai shab-ḳhūñ

taknīk kī is jañg meñ lashkar na milegā

raste hī meñ jal bujhtī hai mahtābī-e-anjum

sābit ko to sayyār kā zevar na milegā

karte haiñ hifāzat sabhī dīvār-e-anā kī

raḳhne ke barābar bhī kahīñ dar na milegā

kūza-gar-e-qāmūs kahāñ 'zeb' sā 'tafzīl'

simTā huā kāġhaz pe samundar na milegā

lahron mein bhanwar niklenge mehwar na milega

har mauj mein pani bhi barabar na milega

gir jati hai roz ek parat rakh badan se

jalne ka saman phir bhi kahin par na milega

chashmak bhi jo rakhni hai to chauthai zamin se

shorida zaban kaise samundar na milega

har samt dimaghon ke tarangon ka hai shab-KHun

taknik ki is jang mein lashkar na milega

raste hi mein jal bujhti hai mahtabi-e-anjum

sabit ko to sayyar ka zewar na milega

karte hain hifazat sabhi diwar-e-ana ki

raKHne ke barabar bhi kahin dar na milega

kuza-gar-e-qamus kahan 'zeb' sa 'tafzil'

simTa hua kaghaz pe samundar na milega