lahu bahta hai chhaalon se kaleja sukh jata hai

lahū bahtā hai chhāloñ se kaleja suukh jaatā hai

ġhamoñ kī dhuup meñ tapne se chehra suukh jaatā hai

sitam dekho firāq-e-yār meñ ro bhī nahīñ sakte

agar rote haiñ to āñkhoñ kā jharnā suukh jaatā hai

bhalā iz.hār ham kaise kareñ apnī tamanna kā

laboñ tak baat aatī hai to lahja suukh jaatā hai

sadā tum husn-e-zan rakhnā agar rishta nibhānā ho

ġhalat-fahmī ne dastak dī to rishta suukh jaatā hai

ziyāda pāsdārī 'ishq meñ achchhī nahīñ 'dānish'

agar paanī ziyāda do to paudā suukh jaatā hai

lahu bahta hai chhaalon se kaleja sukh jata hai

ghamon ki dhup mein tapne se chehra sukh jata hai

sitam dekho firaq-e-yar mein ro bhi nahin sakte

agar rote hain to aankhon ka jharna sukh jata hai

bhala izhaar hum kaise karen apni tamanna ka

labon tak baat aati hai to lahja sukh jata hai

sada tum husn-e-zan rakhna agar rishta nibhana ho

ghalat-fahmi ne dastak di to rishta sukh jata hai

ziyaada pasdari 'ishq mein achchhi nahin 'danish'

agar pani ziyaada do to pauda sukh jata hai