lahu ke aks mein mujhko shumar karta tha

lahū ke aks meñ mujh ko shumār kartā thā

vo shāḳh shāḳh ajab intishār kartā thā

Dhakel detā thā ḳhvāboñ ke ik jazīre meñ

duā bhī mere liye bār-bār kartā thā

nazar pe merī bichhātā thā sub.h-e-manzar-gīr

qadam pe mere shab-e-tār-tār kartā thā

tulū-e-sub.h se pahle vo Dūbtā thā magar

ġhurūb-e-shām se dil be-qarār kartā thā

jo ek shaḳhs akelā guzar gayā mujh se

batā.ūñ kaise ki vo kitnā pyaar kartā thā

sarā.e-jāñ meñ sajātā thā shām-shām ke rang

kuchh is tarah se mujhe be-shumār kartā thā

kabhī-kabhār jo miltā bhī thā añdheroñ meñ

to raushnī kā badan iḳhtiyār kartā thā

ye fā.eda to rahā is badan meñ rahne kā

vo mujh pe lutf-e-nazar baar baar kartā thā

barahna kar ke mire sāmne mirā saaya

zuhūr-e-zāt kā bas intizār kartā thā

ḳhamosh rahtā thā pahroñ hamāre dhyān meñ vo

aur āñdhiy.oñ meñ suḳhan baar baar kartā thā

dikhā sakā na koī khel barg-e-ḳhushk meñ vo

jo shāḳh-e-sabz meñ lail-o-nahār kartā thā

vo dūr-dūr dikhātā thā raqs-e-sho.ala-e-jāñ

baḌhūñ jo aage to mujh se farār kartā thā

uThā ke pheñktā mujh ko vahī ḳhalāoñ meñ

jo gard ban ke mujhe shahsavār kartā thā

maiñ vāqi.a huuñ usī zauq-e-kam-nasīb kā jo

balā-e-jāñ thā magar jāñ-nisār kartā thā

yahīñ kahīñ pe vo chuntā thā phuul yādoñ ke

yahīñ kahīñ pe mirā intizār kartā thā

kabhī kabhī vo utartā thā mere lahje meñ

kabhī kabhī to bahut be-qarār kartā thā

lahu ke aks mein mujh ko shumar karta tha

wo shaKH shaKH ajab intishaar karta tha

Dhakel deta tha KHwabon ke ek jazire mein

dua bhi mere liye bar-bar karta tha

nazar pe meri bichhata tha subh-e-manzar-gir

qadam pe mere shab-e-tar-tar karta tha

tulu-e-subh se pahle wo Dubta tha magar

ghurub-e-sham se dil be-qarar karta tha

jo ek shaKHs akela guzar gaya mujh se

bataun kaise ki wo kitna pyar karta tha

sarae-jaan mein sajata tha sham-sham ke rang

kuchh is tarah se mujhe be-shumar karta tha

kabhi-kabhaar jo milta bhi tha andheron mein

to raushni ka badan iKHtiyar karta tha

ye faeda to raha is badan mein rahne ka

wo mujh pe lutf-e-nazar bar bar karta tha

barahna kar ke mere samne mera saya

zuhur-e-zat ka bas intizar karta tha

KHamosh rahta tha pahron hamare dhyan mein wo

aur aandhiyon mein suKHan bar bar karta tha

dikha saka na koi khel barg-e-KHushk mein wo

jo shaKH-e-sabz mein lail-o-nahaar karta tha

wo dur-dur dikhata tha raqs-e-shoala-e-jaan

baDhun jo aage to mujh se farar karta tha

uTha ke phenkta mujh ko wahi KHalaon mein

jo gard ban ke mujhe shahsawar karta tha

main waqia hun usi zauq-e-kam-nasib ka jo

bala-e-jaan tha magar jaan-nisar karta tha

yahin kahin pe wo chunta tha phul yaadon ke

yahin kahin pe mera intizar karta tha

kabhi kabhi wo utarta tha mere lahje mein

kabhi kabhi to bahut be-qarar karta tha