lahu ki bebasi ko yun na ruswa chhoD dena tha

lahū kī bebasī ko yuuñ na rusvā chhoḌ denā thā

kuchh is meñ ġhairat-e-jāñ kā havāla chhoḌ denā thā

maiñ ā.īnoñ meñ ḳhud ko DhūñDhtā huuñ ḳhud nahīñ miltā

mire chehroñ meñ koī merā chehra chhoḌ denā thā

ajab ghar haiñ ki jin meñ koī khiḌkī hai na darvāza

havā ke aane jaane kā to rasta chhoḌ denā thā

abas sāhil pe tum lahroñ ko kyuuñ gin rahe yūñhī

jo ḳhvāhish motiyoñ kī thī kināra chhoḌ denā thā

unheñ to karbalā kī tishnagī āvāz detī thī

vo dariyā the unheñ shahr-e-madīna chhoḌ denā thā

fasādoñ ke zamāne meñ sukūñ achchhā nahīñ lagtā

kisī afvāh kā koī shagūfa chhoḌ denā thā

numūd-o-nām ne kis ko kahāñ par kab sukūñ baḳhshā

miyāñ is ke liye shohrat kā saudā chhoḌ denā thā

lahu ki bebasi ko yun na ruswa chhoD dena tha

kuchh is mein ghairat-e-jaan ka hawala chhoD dena tha

main aainon mein KHud ko DhunDhta hun KHud nahin milta

mere chehron mein koi mera chehra chhoD dena tha

ajab ghar hain ki jin mein koi khiDki hai na darwaza

hawa ke aane jaane ka to rasta chhoD dena tha

abas sahil pe tum lahron ko kyun gin rahe yunhi

jo KHwahish motiyon ki thi kinara chhoD dena tha

unhen to karbala ki tishnagi aawaz deti thi

wo dariya the unhen shahr-e-madina chhoD dena tha

fasadon ke zamane mein sukun achchha nahin lagta

kisi afwah ka koi shagufa chhoD dena tha

numud-o-nam ne kis ko kahan par kab sukun baKHsha

miyan is ke liye shohrat ka sauda chhoD dena tha