lahu ki dhaar se jazbon ki tughyani se niklunga

lahū kī dhaar se jazboñ kī tuġhyānī se niklūñgā

maiñ sajda ban ke ik din terī peshānī se niklūñgā

tirī āñkhoñ se hoñToñ kā safar mamnū' hai to phir

samundar ban ke terī āñkhoñ ke paanī se niklūñgā

chamak aa.ī hai āñkhoñ meñ musalsal ratjage pā kar

maiñ sūraj ban ke furqat kī farāvānī se niklūñgā

agar uljhūñgā lahje se tire ho jā.uñgā paspā

maiñ apne zabt kī had se pareshānī se niklūñgā

mohabbat kī shu'ā'oñ se bikhar kar rah ga.ī hastī

maiñ kaise hasratoñ kī ab nigahbānī se niklūñgā

basāyā hai muqaddar ne mujhe terī lakīroñ meñ

agar niklā to maiñ apnī hī nādānī se niklūñgā

mirī hastī miTā denā nahīñ mumkin hai kūza-gar

agar miTTī meñ gūñdhegā to maiñ paanī se niklūñgā

maiñ ḳhud apnī musībat aap ban ke aayā huuñ 'aḳhtar'

fanā ho kar hī ab maiñ soz-e-lāfānī se niklūñgā

lahu ki dhaar se jazbon ki tughyani se niklunga

main sajda ban ke ek din teri peshani se niklunga

teri aankhon se honTon ka safar mamnu' hai to phir

samundar ban ke teri aankhon ke pani se niklunga

chamak aai hai aankhon mein musalsal ratjage pa kar

main suraj ban ke furqat ki farawani se niklunga

agar uljhunga lahje se tere ho jaunga paspa

main apne zabt ki had se pareshani se niklunga

mohabbat ki shu'a'on se bikhar kar rah gai hasti

main kaise hasraton ki ab nigahbani se niklunga

basaya hai muqaddar ne mujhe teri lakiron mein

agar nikla to main apni hi nadani se niklunga

meri hasti miTa dena nahin mumkin hai kuza-gar

agar miTTi mein gundhega to main pani se niklunga

main KHud apni musibat aap ban ke aaya hun 'aKHtar'

fana ho kar hi ab main soz-e-lafani se niklunga