lahu ko palte phirte hain hum hina ki tarah

lahū ko pālte phirte haiñ ham hinā kī tarah

badal ga.e haiñ mazāmīñ tirī vafā kī tarah

ham aitabār-e-vafā kā gumāñ kareñ bhī to kyā

vo aaj sūrat-e-gul haiñ to kal sabā kī tarah

use to sañg-e-ra.ūnat ne kar diyā ghāyal

maiñ TuuT TuuT gayā shīsha-e-anā kī tarah

jhaTak ke le gayā bhīgī rutoñ ke imkānāt

nikal gayā mire sahrā se phir havā kī tarah

kabhī khule bhī dar-e-mustajāb-e-chāra-garāñ

bahut dinoñ se tahī-dast huuñ duā kī tarah

asā chhinā hai to kaasa bhī le uḌā koī

navā navā huuñ sar-e-shahr-e-jāñ-e-gadā kī tarah

lagī hai shahr meñ ik bhiiḌ marne vāloñ kī

ye kis ne Daalī hai maqtal meñ ḳhūñ-bahā kī tarah

kahīñ to us ke marāsim meñ jhol thā tāriq

vagarna ham se na miltā vo āshnā kī tarah

lahu ko palte phirte hain hum hina ki tarah

badal gae hain mazamin teri wafa ki tarah

hum aitabar-e-wafa ka guman karen bhi to kya

wo aaj surat-e-gul hain to kal saba ki tarah

use to sang-e-raunat ne kar diya ghayal

main TuT TuT gaya shisha-e-ana ki tarah

jhaTak ke le gaya bhigi ruton ke imkanat

nikal gaya mere sahra se phir hawa ki tarah

kabhi khule bhi dar-e-mustajab-e-chaara-garan

bahut dinon se tahi-dast hun dua ki tarah

asa chhina hai to kasa bhi le uDa koi

nawa nawa hun sar-e-shahr-e-jaan-e-gada ki tarah

lagi hai shahr mein ek bhiD marne walon ki

ye kis ne Dali hai maqtal mein KHun-baha ki tarah

kahin to us ke marasim mein jhol tha tariq

wagarna hum se na milta wo aashna ki tarah