lahu lahu aarzu badan ka lihaf hoga

lahū lahū aarzū badan kā lihāf hogā

vo kitnā buzdil hai aaj ye inkishāf hogā

mirī har ik baat thī haqā.eq kī raushnī meñ

ye jāntā thā zamāna mere ḳhilāf hogā

haqīqatoñ ke charāġh har-sū jalā ke rakhnā

mujhe yaqīñ hai ki jhuuT kā in.etāf hogā

ye ġham nahīñ hai shanāḳht apnī maiñ kho chukā huuñ

tumhārī hastī se kab mujhe inhirāf hogā

na khoj ḳhud ko purāne kal kī kahāniyoñ meñ

purānā kal to shikast kā e'tirāf hogā

hamārī bātoñ meñ koī pechīdgī nahīñ hai

hamārī bātoñ se kab use iḳhtilāf hogā

rumūz-e-ālam pe dastaras us ko hogī hāsil

vo shaḳhs kirdār jis kā shaffaf-o-sāf hogā

sazā ke Dar se abas tū ghabrā rahā hai 'anjum'

qusūr pahlā to har kisī ko muaaf hogā

lahu lahu aarzu badan ka lihaf hoga

wo kitna buzdil hai aaj ye inkishaf hoga

meri har ek baat thi haqaeq ki raushni mein

ye jaanta tha zamana mere KHilaf hoga

haqiqaton ke charagh har-su jala ke rakhna

mujhe yaqin hai ki jhuT ka inetaf hoga

ye gham nahin hai shanaKHt apni main kho chuka hun

tumhaari hasti se kab mujhe inhiraf hoga

na khoj KHud ko purane kal ki kahaniyon mein

purana kal to shikast ka e'tiraf hoga

hamari baaton mein koi pechidgi nahin hai

hamari baaton se kab use iKHtilaf hoga

rumuz-e-alam pe dastaras us ko hogi hasil

wo shaKHs kirdar jis ka shaffaf-o-saf hoga

saza ke Dar se abas tu ghabra raha hai 'anjum'

qusur pahla to har kisi ko muaf hoga