lahu mein apne sar-e-sham jal bujha suraj

lahū meñ apne sar-e-shām jal bujhā sūraj

ik isti.āra mirī aarzū kā thā sūraj

hai umr-bhar kī rifāqat magar mire ġham se

na āshnā haiñ sitāre na āshnā sūraj

ik aisā daur bhī guzrā tirī lagan meñ ki jab

mirī jabīñ pe sitāre the zer-e-pā sūraj

ye mujh ko kaise añdheroñ meñ lā ke chhoḌ gayā

mire jahān-e-tarab kā gurez pā sūraj

sunā hai aa.ine sūraj ke haiñ mah-o-parvīñ

maiñ sochtā huuñ ki hai kis kā aa.ina sūraj

hamāre ahd meñ min-jumla-e-nujūm sahī

rahā hai apne zamāne meñ devtā sūraj

shab-e-siyah kī pur-asrār kār-gāhoñ meñ

sahar tarāsh rahī hai koī nayā sūraj

har ek zarre meñ hai bāz-gasht-e-nūr-e-azal

zamīñ kī ḳhaak meñ zam haiñ hazār-hā sūraj

lahu mein apne sar-e-sham jal bujha suraj

ek istiara meri aarzu ka tha suraj

hai umr-bhar ki rifaqat magar mere gham se

na aashna hain sitare na aashna suraj

ek aisa daur bhi guzra teri lagan mein ki jab

meri jabin pe sitare the zer-e-pa suraj

ye mujh ko kaise andheron mein la ke chhoD gaya

mere jahan-e-tarab ka gurez pa suraj

suna hai aaine suraj ke hain mah-o-parwin

main sochta hun ki hai kis ka aaina suraj

hamare ahd mein min-jumla-e-nujum sahi

raha hai apne zamane mein dewta suraj

shab-e-siyah ki pur-asrar kar-gahon mein

sahar tarash rahi hai koi naya suraj

har ek zarre mein hai baz-gasht-e-nur-e-azal

zamin ki KHak mein zam hain hazar-ha suraj