lahu mein Duba hua mila hai wafa ka har ek usul tujhko

lahū meñ Duubā huā milā hai vafā kā har ik usuul tujh ko

maiñ jāntā huuñ pasand kyuuñ haiñ gulāb ke surḳh phuul tujh ko

gavāh ban kar batā rahī haiñ ye surḳhiyāñ terī uñgliyoñ kī

sameTne paḌ rahe haiñ ḳhuñḳhār jañgaloñ ke babūl tujh ko

thakī anā kā safar kahāñ tak kahīñ to ruk jā kahīñ to dam le

banā diyā hai masāfatoñ ne tire qadam kī hī dhuul tujh ko

ye reza reza sī ārzūeñ kabhī to kar de mire havāle

maiñ apne bikhre badan kī mānind dekhtā huuñ malūl tujh ko

ufuq ke us paar bhī munāsib nahīñ hai ādarsh kā ta.āqub

kahīñ tujhe be-vatan na kar de tirā ye shauq-e-fuzūl tujh ko

vo ḳhat raqīboñ ke haath aayā likhā thā jo mere naam tū ne

kahāñ kahāñ kar chukī hai rusvā tirī ye chhoTī sī bhuul tujh ko

tujhī ko nafrat rahī hai jin se vo jin kī ta.abīr sirf tū hai

vo āḳhir-e-shab ke ḳhvāb karne paḌeñge āḳhir qubūl tujh ko

'qatīl' kitne hī lafz apnī asaas kā zā.iqa badal leñ

agar batā duuñ kabhī maiñ apnī ġhazal kī shān-e-nuzūl tujh ko

lahu mein Duba hua mila hai wafa ka har ek usul tujh ko

main jaanta hun pasand kyun hain gulab ke surKH phul tujh ko

gawah ban kar bata rahi hain ye surKHiyan teri ungliyon ki

sameTne paD rahe hain KHunKHar jangalon ke babul tujh ko

thaki ana ka safar kahan tak kahin to ruk ja kahin to dam le

bana diya hai masafaton ne tere qadam ki hi dhul tujh ko

ye reza reza si aarzuen kabhi to kar de mere hawale

main apne bikhre badan ki manind dekhta hun malul tujh ko

ufuq ke us par bhi munasib nahin hai aadarsh ka taaqub

kahin tujhe be-watan na kar de tera ye shauq-e-fuzul tujh ko

wo KHat raqibon ke hath aaya likha tha jo mere nam tu ne

kahan kahan kar chuki hai ruswa teri ye chhoTi si bhul tujh ko

tujhi ko nafrat rahi hai jin se wo jin ki tabir sirf tu hai

wo aaKHir-e-shab ke KHwab karne paDenge aaKHir qubul tujh ko

'qatil' kitne hi lafz apni asas ka zaiqa badal len

agar bata dun kabhi main apni ghazal ki shan-e-nuzul tujh ko