lahu na aankh se Tapka na zaKHm-e-dil ubhre

lahū na aañkh se Tapkā na zaḳhm-e-dil ubhre

bharī bahār ke ye din bahut girāñ guzre

vo pur-fareb nigāheñ vo e'timād kī maut

na jaane zehn pe maazī ke naqsh kyoñ ubhre

hasīn lamhe mirī zindagī ke lauTā de

jo aarzū meñ kaTe terī yaad meñ guzre

junūñ-navāz nigāheñ haiñ rahnumā apnī

na jaane qāfila-e-zindagī kahāñ Thahre

savāl-e-tark-e-vafā tum ne ḳhud uThāyā thā

udaas kyoñ haiñ nigāheñ ye baal yuuñ bikhre

na jaane aaj hī kyoñ dil kī nabz Duub ga.ī

tire dayār se ham yuuñ to bārhā guzre

yahī hai jān-e-mohabbat yahī shu.ūr-e-vafā

zabāñ ḳhamosh nigāhoñ pe laaj ke pahre

qadam qadam pe fasāne baneñge ai 'māhir'

yahāñ na aañkh hī bhīge na muñh kā rang utre

lahu na aankh se Tapka na zaKHm-e-dil ubhre

bhari bahaar ke ye din bahut giran guzre

wo pur-fareb nigahen wo e'timad ki maut

na jaane zehn pe mazi ke naqsh kyon ubhre

hasin lamhe meri zindagi ke lauTa de

jo aarzu mein kaTe teri yaad mein guzre

junun-nawaz nigahen hain rahnuma apni

na jaane qafila-e-zindagi kahan Thahre

sawal-e-tark-e-wafa tum ne KHud uThaya tha

udas kyon hain nigahen ye baal yun bikhre

na jaane aaj hi kyon dil ki nabz Dub gai

tere dayar se hum yun to barha guzre

yahi hai jaan-e-mohabbat yahi shuur-e-wafa

zaban KHamosh nigahon pe laj ke pahre

qadam qadam pe fasane banenge ai 'mahir'

yahan na aankh hi bhige na munh ka rang utre