lahuluhan hain hum aur jaan-balab bhi nahin

lahūluhān haiñ ham aur jāñ-balab bhī nahīñ

sitam-shi’āroñ ko ehsās is kā ab bhī nahīñ

jab iḳhtiyār saped-o-siyāh kā thā hameñ

hamāre ghar meñ farozāñ thī sham' tab bhī nahīñ

luTā dī jis ke liye sab matā’-e-qalb-o-jigar

usī ko merī vafā kā yaqīn ab bhī nahīñ

sunegā kaun vahāñ dāstān-e-ġham merī

maiñ us kī bazm meñ ik harf-e-zer-e-lab bhī nahīñ

basar jo hotī tire gesuoñ ke saa.e meñ

mire nasīb meñ aisī to ek shab bhī nahīñ

unheñ to aap na Thahrā.eñ mūrid-e-ilzām

sitam-nasīb haiñ lekin vo be-adab bhī nahīñ

nigāh pher le duniyā jo merī jānib se

maiñ aisā dosto be-nām be-nasab bhī nahīñ

karam-navāziyāñ un kī bhī haiñ 'ajab 'dānish'

ki aañkh nam bhī nahīñ shikva-sanj lab bhī nahīñ

lahuluhan hain hum aur jaan-balab bhi nahin

sitam-shi’aron ko ehsas is ka ab bhi nahin

jab iKHtiyar saped-o-siyah ka tha hamein

hamare ghar mein farozan thi sham' tab bhi nahin

luTa di jis ke liye sab mata’-e-qalb-o-jigar

usi ko meri wafa ka yaqin ab bhi nahin

sunega kaun wahan dastan-e-gham meri

main us ki bazm mein ek harf-e-zer-e-lab bhi nahin

basar jo hoti tere gesuon ke sae mein

mere nasib mein aisi to ek shab bhi nahin

unhen to aap na Thahraen murid-e-ilzam

sitam-nasib hain lekin wo be-adab bhi nahin

nigah pher le duniya jo meri jaanib se

main aisa dosto be-nam be-nasab bhi nahin

karam-nawaziyan un ki bhi hain 'ajab 'danish'

ki aankh nam bhi nahin shikwa-sanj lab bhi nahin