lambi KHamoshi ki sazish ko harae koi

lambī ḳhāmoshī kī sāzish ko harā.e koī

merī āvāz meñ āvāz milā.e koī

maiñ bhī uḌ saktā huuñ ākāsh ko chhū saktā huuñ

merā soyā huā ehsās jagā.e koī

koī to hogā mujhe DhūñDne vaalā yaaro

merā gumnām pata sab ko batā.e koī

aisā lagtā ki sab bhuul ga.e haiñ mujh ko

mere darvāze pe āvāz lagā.e koī

har taraf sirf sarāb aur sarāb aur sarāb

kab tak āñkhoñ se bhalā pyaas bujhā.e koī

sach hai maiñ ne hī ḳhamoshī kī guzārish kī thī

ab mirī gum-shuda āvāz to lauTā.e koī

jis ko sun kar mire darvāze pe lag jaa.e hujūm

is tarah kī koī afvāh uḌaa.e koī

lambi KHamoshi ki sazish ko harae koi

meri aawaz mein aawaz milae koi

main bhi uD sakta hun aakash ko chhu sakta hun

mera soya hua ehsas jagae koi

koi to hoga mujhe DhunDne wala yaro

mera gumnam pata sab ko batae koi

aisa lagta ki sab bhul gae hain mujh ko

mere darwaze pe aawaz lagae koi

har taraf sirf sarab aur sarab aur sarab

kab tak aankhon se bhala pyas bujhae koi

sach hai main ne hi KHamoshi ki guzarish ki thi

ab meri gum-shuda aawaz to lauTae koi

jis ko sun kar mere darwaze pe lag jae hujum

is tarah ki koi afwah uDae koi