lamha-e-ishq tujhe aag lagane laga hun

lamha-e-'ishq tujhe aag lagāne lagā huuñ

apnī barbādī kā maiñ jashn manāne lagā huuñ

tire hone kī talab mujh ko satāne lagī hai

so maiñ tanhā.ī ko ab raah pe laane lagā huuñ

log yuuñ majma' lagā.e hue haiñ gird mire

jis tarah koī tamāshā maiñ dikhāne lagā huuñ

toḌ kar mujh ko miyāñ tū bhī salāmat na rahā

apne malbe se tire naqsh uThāne lagā huuñ

mahv-e-hairat hai mire sāmne duniyā vaale

jaise qudrat kā koī raaz batāne lagā huuñ

munjamid kar ke tire 'ahd ke saare qisse

ik sharar vā'da-e-fardā ko dikhāne lagā huuñ

ab mire dil meñ koī shaḳhs utar aaya hai

ab tire dil se bahut duur maiñ jaane lagā huuñ

maiñ ne tanhā.ī meñ ye 'ahd kiyā thā ḳhud se

kitnī āsānī se 'shahzād' Thikāne lagā huuñ

lamha-e-'ishq tujhe aag lagane laga hun

apni barbaadi ka main jashn manane laga hun

tere hone ki talab mujh ko satane lagi hai

so main tanhai ko ab rah pe lane laga hun

log yun majma' lagae hue hain gird mere

jis tarah koi tamasha main dikhane laga hun

toD kar mujh ko miyan tu bhi salamat na raha

apne malbe se tere naqsh uThane laga hun

mahw-e-hairat hai mere samne duniya wale

jaise qudrat ka koi raaz batane laga hun

munjamid kar ke tere 'ahd ke sare qisse

ek sharar wa'da-e-farda ko dikhane laga hun

ab mere dil mein koi shaKHs utar aaya hai

ab tere dil se bahut dur main jaane laga hun

main ne tanhai mein ye 'ahd kiya tha KHud se

kitni aasani se 'shahzad' Thikane laga hun