lams ko chhoD ke KHushbu pe qanaat nahin karne wala

lams ko chhoḌ ke ḳhushbū pe qanā.at nahīñ karne vaalā

aisī-vaisī to maiñ ab tum se mohabbat nahīñ karne vaalā

mujh se behtar koī duniyā meñ kitābat nahīñ karne vaalā

par tire hijr kī maiñ jald ishā.at nahīñ karne vaalā

apne hī jism ko kal us ne mirī āñkhoñ se puurā dekhā

is se baḌh kar koī manzar kabhī hairat nahīñ karne vaalā

maz.hab-e-ishq se mansūb ye bāteñ to ḳhārij kī haiñ

shām-e-hijrāñ maiñ kisī taur maiñ shirkat nahīñ karne vaalā

aisī bhagdaḌ meñ koī paaoñ tale aa.e to shikva na kare

gir gayā maiñ to koī mujh se ri.āyat nahīñ karne vaalā

lau larazne kā koī aur hī matlab na nikal aa.e kahīñ

pūchhne par bhī charāġh aur vazāhat nahīñ karne vaalā

mujhe chalte hue raste ke shajar dekhte jaate haiñ 'razā'

par mire saath ukhaḌ kar koī hijrat nahīñ karne vaalā

lams ko chhoD ke KHushbu pe qanaat nahin karne wala

aisi-waisi to main ab tum se mohabbat nahin karne wala

mujh se behtar koi duniya mein kitabat nahin karne wala

par tere hijr ki main jald ishaat nahin karne wala

apne hi jism ko kal us ne meri aankhon se pura dekha

is se baDh kar koi manzar kabhi hairat nahin karne wala

mazhab-e-ishq se mansub ye baaten to KHarij ki hain

sham-e-hijran main kisi taur main shirkat nahin karne wala

aisi bhagdaD mein koi paon tale aae to shikwa na kare

gir gaya main to koi mujh se riayat nahin karne wala

lau larazne ka koi aur hi matlab na nikal aae kahin

puchhne par bhi charagh aur wazahat nahin karne wala

mujhe chalte hue raste ke shajar dekhte jate hain 'raza'

par mere sath ukhaD kar koi hijrat nahin karne wala