laraz raha tha falak arz-e-haal aisa tha

laraz rahā thā falak arz-e-hāl aisā thā

shikastagī meñ zamīñ kā savāl aisā thā

kamāl aisā ki hairat meñ charḳh-e-nīlī-fām

shajar uThā na sakā sar zavāl aisā thā

kisī vajūd kī koī ramaq na ho jaise

darāz silsila-e-māh-o-sāl aisā thā

khilā huā thā badan par jarāhatoñ kā chaman

ki zaḳhm phail gayā indimāl aisā thā

kabhī ye taḳht-e-sulaimāñ kabhī sabā raftār

nasha chaḌhā to samand-e-ḳhayāl aisā thā

ghire hue the jo bādal baras ke tham bhī ga.e

bichhā huā thā jo tāroñ kā jaal aisā thā

kabhī vo shola-e-gul thā kabhī gul-e-shola

mizāj-e-husn meñ kuchh e'tidāl aisā thā

vo āñkheñ qahr meñ bhī kar ga.iiñ mujhe shādāb

faroġh-e-bāda meñ rañg-e-jamāl aisā thā

kisī se haath milāne meñ dil nahīñ miltā

talab meñ shā.iba-e-ehtimāl aisā thā

laraz raha tha falak arz-e-haal aisa tha

shikastagi mein zamin ka sawal aisa tha

kamal aisa ki hairat mein charKH-e-nili-fam

shajar uTha na saka sar zawal aisa tha

kisi wajud ki koi ramaq na ho jaise

daraaz silsila-e-mah-o-sal aisa tha

khila hua tha badan par jarahaton ka chaman

ki zaKHm phail gaya indimal aisa tha

kabhi ye taKHt-e-sulaiman kabhi saba raftar

nasha chaDha to samand-e-KHayal aisa tha

ghire hue the jo baadal baras ke tham bhi gae

bichha hua tha jo taron ka jal aisa tha

kabhi wo shola-e-gul tha kabhi gul-e-shola

mizaj-e-husn mein kuchh e'tidal aisa tha

wo aankhen qahr mein bhi kar gain mujhe shadab

farogh-e-baada mein rang-e-jamal aisa tha

kisi se hath milane mein dil nahin milta

talab mein shaiba-e-ehtimal aisa tha