larazta rahta hun kar de na pash-pash mujhe

laraztā rahtā huuñ kar de na pāsh-pāsh mujhe

tarāshtā hai 'ajab taur but-tarāsh mujhe

kahīñ talāsh kā hāsil tirā badan hī na ho

na.e jazīra-e-duniyā kī hai talāsh mujhe

kisī ke husn ne baḳhshī hai mujh ko bīnā.ī

kisī ke lams ne baḳhshā hai irti'āsh mujhe

agar maiñ haar chukā huuñ mujhe yaqīn dilā

shikast hī nahīñ lagtī shikast-e-fāsh mujhe

koī tamanna taḌaptī hai mere siine meñ

sunā.ī detī hai āvāz-e-dil-ḳharāsh mujhe

maiñ apne aap meñ har roz qatl hotā huuñ

mire makān se miltī hai roz laash mujhe

larazta rahta hun kar de na pash-pash mujhe

tarashta hai 'ajab taur but-tarash mujhe

kahin talash ka hasil tera badan hi na ho

nae jazira-e-duniya ki hai talash mujhe

kisi ke husn ne baKHshi hai mujh ko binai

kisi ke lams ne baKHsha hai irti'ash mujhe

agar main haar chuka hun mujhe yaqin dila

shikast hi nahin lagti shikast-e-fash mujhe

koi tamanna taDapti hai mere sine mein

sunai deti hai aawaz-e-dil-KHarash mujhe

main apne aap mein har roz qatl hota hun

mere makan se milti hai roz lash mujhe