latif pardon se the numayan makin ke jalwe makan se pahle

latīf pardoñ se the numāyāñ makīñ ke jalve makāñ se pahle

mohabbat ā.īna ho chukī thī vajūd-e-bazm-e-jahāñ se pahle

na vo mire dil se bā-ḳhabar the na un ko ehsās-e-ārzū thā

magar nizām-e-vafā thā qaa.em kushūd-e-rāz-e-nihāñ se pahle

har ek unvān-e-dard-e-furqat hai ibtidā sharh-e-mudda.a kī

koī batā.e ki ye fasāna sunā.eñ un ko kahāñ se pahle

masarrateñ rāzdār-e-ġham thiiñ masarratoñ meñ alam thā pinhāñ

jabhī to sehn-e-chaman meñ shāyad bahār aa.ī ḳhizāñ se pahle

samajh rahā thā ki nā-umīdī na parda-dār-e-umīd hogī

nazar uThā kar jo maiñ ne dekhā ġhubār thā kārvāñ se pahle

uThā jo miinā ba-dast-e-sāqī rahī na kuchh tāb-e-zabt baaqī

tamām mai-kash pukār uTThe yahāñ se pahle yahāñ se pahle

qasam fareb-e-nigāh-o-dil kī hameñ to us justujū ne khoyā

vahīñ thī dar-asl apnī manzil qadam uThe the jahāñ se pahle

azal se shāyad likhe hue the 'shakīl' qismat meñ jaur-e-paiham

khulī jo āñkheñ is anjuman meñ nazar milī āsmāñ se pahle

latif pardon se the numayan makin ke jalwe makan se pahle

mohabbat aaina ho chuki thi wajud-e-bazm-e-jahan se pahle

na wo mere dil se ba-KHabar the na un ko ehsas-e-arzu tha

magar nizam-e-wafa tha qaem kushud-e-raaz-e-nihan se pahle

har ek unwan-e-dard-e-furqat hai ibtida sharh-e-mudda ki

koi batae ki ye fasana sunaen un ko kahan se pahle

masarraten raazdar-e-gham thin masarraton mein alam tha pinhan

jabhi to sehn-e-chaman mein shayad bahaar aai KHizan se pahle

samajh raha tha ki na-umidi na parda-dar-e-umid hogi

nazar uTha kar jo main ne dekha ghubar tha karwan se pahle

uTha jo mina ba-dast-e-saqi rahi na kuchh tab-e-zabt baqi

tamam mai-kash pukar uTThe yahan se pahle yahan se pahle

qasam fareb-e-nigah-o-dil ki hamein to us justuju ne khoya

wahin thi dar-asl apni manzil qadam uThe the jahan se pahle

azal se shayad likhe hue the 'shakil' qismat mein jaur-e-paiham

khuli jo aankhen is anjuman mein nazar mili aasman se pahle