lau baDha jati hai zaKHmon ki saba sham ke baad

lau baḌhā jaatī hai zaḳhmoñ kī sabā shaam ke baad

jagmagāte haiñ charāġhān-e-vafā shaam ke baad

aag chhiḌkī ga.ī jaltī huī tanhā.ī par

sarsarā.ī tirī zulfoñ kī havā shaam ke baad

dil ke jalte hue shahroñ se pare duur kahīñ

terī lai meñ thā koī naġhma-sarā shaam ke baad

din ke hangāmoñ kī har choT javāñ hotī hai

phir sañbhaltī hai mirī laġhzish-e-pā shaam ke baad

sub.h jaagī to mahakne lage zaḳhmoñ ke gulāb

ġham kī palkoñ pe jalī dil kī chitā shaam ke baad

zehn ḳhvāboñ kī salīboñ pe laTaktā hī rahā

jhanjhanātī rahī zanjīr-e-jafā shaam ke baad

ye dakan ye lab-e-mūsā ye sanam-zār 'kalīm'

umr-e-rafta mujhe detī hai sadā shaam ke baad

lau baDha jati hai zaKHmon ki saba sham ke baad

jagmagate hain charaghan-e-wafa sham ke baad

aag chhiDki gai jalti hui tanhai par

sarsarai teri zulfon ki hawa sham ke baad

dil ke jalte hue shahron se pare dur kahin

teri lai mein tha koi naghma-sara sham ke baad

din ke hangamon ki har choT jawan hoti hai

phir sanbhalti hai meri laghzish-e-pa sham ke baad

subh jagi to mahakne lage zaKHmon ke gulab

gham ki palkon pe jali dil ki chita sham ke baad

zehn KHwabon ki salibon pe laTakta hi raha

jhanjhanati rahi zanjir-e-jafa sham ke baad

ye dakan ye lab-e-musa ye sanam-zar 'kalim'

umr-e-rafta mujhe deti hai sada sham ke baad