lau charagh-e-hasti ki har qadam pe larzan hai

lau charāġh-e-hastī kī har qadam pe larzāñ hai

jab se tum gurezāñ ho zindagī pareshāñ hai

qaid-e-be-salāsil hai tā.eroñ kī āzādī

ehtisāb ho jis meñ vo chaman bhī zindāñ hai

pal rahe haiñ shāḳhoñ par ḳhaar kī tarah ham bhī

aap kī bahāreñ haiñ aap kā gulistāñ hai

aur baḌhne vaalī haiñ zulmateñ shab-e-ġham kī

in hasīñ ujāloñ meñ kuchh fareb pinhāñ haiñ

ik nazar kī fursat bhī aap ko nahīñ miltī

kab se mere hāthoñ meñ aarzū kā dāmāñ hai

aa ke terī mahfil meñ ho rahā hai andāza

ziist kitnī mushkil hai maut kitnī āsāñ hai

ḳhuun shāh-rāhoñ par ḳhuun tang galiyoñ meñ

'soz' is zamāne meñ ḳhuun kitnā arzāñ hai

lau charagh-e-hasti ki har qadam pe larzan hai

jab se tum gurezan ho zindagi pareshan hai

qaid-e-be-salasil hai taeron ki aazadi

ehtisab ho jis mein wo chaman bhi zindan hai

pal rahe hain shaKHon par KHar ki tarah hum bhi

aap ki bahaaren hain aap ka gulistan hai

aur baDhne wali hain zulmaten shab-e-gham ki

in hasin ujalon mein kuchh fareb pinhan hain

ek nazar ki fursat bhi aap ko nahin milti

kab se mere hathon mein aarzu ka daman hai

aa ke teri mahfil mein ho raha hai andaza

zist kitni mushkil hai maut kitni aasan hai

KHun shah-rahon par KHun tang galiyon mein

'soz' is zamane mein KHun kitna arzan hai