lauT kar jaise daur-e-shabab aa gaya

lauT kar jaise daur-e-shabāb aa gayā

aap kyā aa ga.e inqalāb aa gayā

is tarah dil ke armān puure hue

nāma-bar le ke ḳhat kā javāb aa gayā

dekhne ko tarastī thiiñ āñkheñ jise

sāmne vo mire be-hijāb aa gayā

gulshan-e-dil pe ik tāzgī chhā ga.ī

ban ke vo ik mujassam gulāb aa gayā

ālam-e-ḳhvāb meñ jis ko paḌhtā thā maiñ

rū-e-zebā kī le kar kitāb aa gayā

jis ke jaane se tārīk thī zindagī

ḳhāna-e-dil meñ bā-āb-o-tāb aa gayā

zehn mā.ūf thā ginte ginte jise

aaj 'barqī' vo roz-e-hisāb aa gayā

lauT kar jaise daur-e-shabab aa gaya

aap kya aa gae inqalab aa gaya

is tarah dil ke arman pure hue

nama-bar le ke KHat ka jawab aa gaya

dekhne ko tarasti thin aankhen jise

samne wo mere be-hijab aa gaya

gulshan-e-dil pe ek tazgi chha gai

ban ke wo ek mujassam gulab aa gaya

aalam-e-KHwab mein jis ko paDhta tha main

ru-e-zeba ki le kar kitab aa gaya

jis ke jaane se tarik thi zindagi

KHana-e-dil mein ba-ab-o-tab aa gaya

zehn mauf tha ginte ginte jise

aaj 'barqi' wo roz-e-hisab aa gaya