lazzat si pa rahe hain gham-e-ashiqi se hum

lazzat sī pā rahe haiñ ġham-e-āshiqī se ham

kuchh vaqt aur māñgte haiñ zindagī se ham

jaise the bazm meñ na muḳhātib kisī se ham

afsāna un se kah ga.e is sādgī se ham

is darja baḌh ga.e haiñ had-e-be-ḳhudī se ham

ab to usī ko pūchh rahe haiñ usī se ham

rangīnī-e-fareb-e-tabassum na pūchhiye

kis sādgī meñ aa ga.e kis sādgī se ham

husn-e-talab hai ye koī dīvāngī nahīñ

haañ haañ tujhī ko maañg rahe haiñ tujhī se ham

dekhā kabhī unheñ kabhī ḳhud par nigāh kī

khele haiñ maut se to kabhī zindagī se ham

rañgīni-e-hayāt sarāb-e-hayāt hai

paiġhām sun rahe haiñ ye har ik kalī se ham

ai dil vo aa.eñ bahr-e-'ayādat yaqīñ nahīñ

uljheñ fuzūl kyoñ nafas-e-āḳhirī se ham

hotī hai ashk-e-ġham hī se taskīn-e-shām-e-ġham

dil kī lagī bujhāte haiñ dil kī lagī se ham

haiñ dāġh-hā-e-dil kī shab-e-ġham navāzisheñ

tārīkiyoñ meñ khelte haiñ chāñdnī se ham

zehn-āzmā hai raaz nayā roz ai 'shifā'

tang aa ga.e haiñ silsila-e-āgahī se ham

lazzat si pa rahe hain gham-e-ashiqi se hum

kuchh waqt aur mangte hain zindagi se hum

jaise the bazm mein na muKHatib kisi se hum

afsana un se kah gae is sadgi se hum

is darja baDh gae hain had-e-be-KHudi se hum

ab to usi ko puchh rahe hain usi se hum

rangini-e-fareb-e-tabassum na puchhiye

kis sadgi mein aa gae kis sadgi se hum

husn-e-talab hai ye koi diwangi nahin

han han tujhi ko mang rahe hain tujhi se hum

dekha kabhi unhen kabhi KHud par nigah ki

khele hain maut se to kabhi zindagi se hum

rangini-e-hayat sarab-e-hayat hai

paigham sun rahe hain ye har ek kali se hum

ai dil wo aaen bahr-e-'ayaadat yaqin nahin

uljhen fuzul kyon nafas-e-aKHiri se hum

hoti hai ashk-e-gham hi se taskin-e-sham-e-gham

dil ki lagi bujhate hain dil ki lagi se hum

hain dagh-ha-e-dil ki shab-e-gham nawazishen

tarikiyon mein khelte hain chandni se hum

zehn-azma hai raaz naya roz ai 'shifa'

tang aa gae hain silsila-e-agahi se hum