le etibar-e-wada-e-farda nahin raha

le e'tibār-e-vāda-e-fardā nahīñ rahā

ab ye bhī zindagī kā sahārā nahīñ rahā

tum mujh se kyā phire ki qayāmat sī aa ga.ī

ye kyā huā ki koī kisī kā nahīñ rahā

kyā kyā gile na the ki idhar dekhte nahīñ

dekhā to koī dekhne vaalā nahīñ rahā

aaheñ hujūm-e-yās meñ kuchh aisī kho ga.iiñ

dil āshnā-e-dard hī goyā nahīñ rahā

allāh re chashm-e-hosh kī kasrat-parastiyāñ

zarre hī rah ga.e koī sahrā nahīñ rahā

de un pe jaan jis ko ġharaz ho ki dil ke baad

un kī nigāh kā vo taqāzā nahīñ rahā

tum do-ghaḌī ko aa.e na bīmār ke qarīb

bīmār do-ghaḌī ko bhī achchhā nahīñ rahā

'fānī' bas ab ḳhudā ke liye zikr-e-dil na chheḌ

jaane bhī de balā se rahā yā nahīñ rahā

le e'tibar-e-wada-e-farda nahin raha

ab ye bhi zindagi ka sahaara nahin raha

tum mujh se kya phire ki qayamat si aa gai

ye kya hua ki koi kisi ka nahin raha

kya kya gile na the ki idhar dekhte nahin

dekha to koi dekhne wala nahin raha

aahen hujum-e-yas mein kuchh aisi kho gain

dil aashna-e-dard hi goya nahin raha

allah re chashm-e-hosh ki kasrat-parastiyan

zarre hi rah gae koi sahra nahin raha

de un pe jaan jis ko gharaz ho ki dil ke baad

un ki nigah ka wo taqaza nahin raha

tum do-ghaDi ko aae na bimar ke qarib

bimar do-ghaDi ko bhi achchha nahin raha

'fani' bas ab KHuda ke liye zikr-e-dil na chheD

jaane bhi de bala se raha ya nahin raha