le ke dil kahte ho ulfat kya hai

le ke dil kahte ho ulfat kyā hai

husn vaalo ye sharārat kyā hai

ik uchaTtī sī taġhāful kī nigāh

hīla-e-arz-e-mohabbat kyā hai

ḳhud hī nādim huuñ vafā par apnī

us tabassum kī zarūrat kyā hai

mujh ko bohtān-e-havas bhī manzūr

kaun samjhegā haqīqat kyā hai

nikhat-o-nūr ke sāñsoñ kā kamāñ

varna tū kyā mirī sūrat kyā hai

qāmat-e-yār kī bigḌī huī shakl

fitna-e-roz-e-qayāmat kyā hai

kis kī himmat ki tujhe saath lagā.e

tū ba-juz mauj-e-latāfat kyā hai

rabt mahsūs kī uljhan ke sivā

aap kā jazba-e-nafrat kyā hai

ashk-e-ġham buuñd hai paanī kī magar

ye bhī ma.alūm hai qīmat kyā hai

dāman-e-nāz kī jhāḌī huī gard

aur insāñ kī haqīqat kyā hai

maiñ ki ik gauhar-e-ālūda-e-ḳhāk

kuchh na samjhā mirī qīmat kyā hai

tālib-e-dād-e-suḳhan kyuuñ ho 'nisār'

aap ke sher meñ jiddat kyā hai

le ke dil kahte ho ulfat kya hai

husn walo ye shararat kya hai

ek uchaTti si taghaful ki nigah

hila-e-arz-e-mohabbat kya hai

KHud hi nadim hun wafa par apni

us tabassum ki zarurat kya hai

mujh ko bohtan-e-hawas bhi manzur

kaun samjhega haqiqat kya hai

nikhat-o-nur ke sanson ka kaman

warna tu kya meri surat kya hai

qamat-e-yar ki bigDi hui shakl

fitna-e-roz-e-qayamat kya hai

kis ki himmat ki tujhe sath lagae

tu ba-juz mauj-e-latafat kya hai

rabt mahsus ki uljhan ke siwa

aap ka jazba-e-nafrat kya hai

ashk-e-gham bund hai pani ki magar

ye bhi malum hai qimat kya hai

daman-e-naz ki jhaDi hui gard

aur insan ki haqiqat kya hai

main ki ek gauhar-e-aluda-e-KHak

kuchh na samjha meri qimat kya hai

talib-e-dad-e-suKHan kyun ho 'nisar'

aap ke sher mein jiddat kya hai